1Imbagħad wieġeb Sofar in-Nagħmi u qal:
2“Se jitħalla bla tweġiba dan il-lablabi?
Jaqaw min jgħid ħafna jieħu raġun?
3Taħseb int li se jsikket in-nies tpaċpiċek?
Se tibqa’ żżeblaħ u ma jċanfrek ħadd?
4Int tgħid: ‘Safi t-tagħlim tiegħi,
bla ħtija jien quddiem Alla.’
5Mhux li kien jitkellem Alla
u jiftaħ miegħek fommu!
6Li kien jurik il-misteri ta’ għerfu,
li huma tqal biex tifhimhom,
kont tagħraf kemm iħallsek inqas milli ħaqqu dnubek!
7Taħseb inti li se tikxef il-misteru ta’ Alla,
jew tilħaq it-tarf ta’ Xaddaj?
8Hu ogħla mis-smewwiet: kif se tilħqu?
Hu aktar fond mill-Qiegħ: x’taf int bħalek?
9Jgħaddiha l-art minn tulu,
u l-baħar mill-wisa’ tiegħu.
10Jekk jiġi jaqbad u jarresta ’l xi ħadd
u għall-ħaqq isejjaħlu, min iżommu?
11Hu jaf min huma l-bnedmin qarrieqa,
jara l-ħażen u jiżnu sewwa.
12Iżda l-iblah idaħħal f’moħħu
meta l-ħmar selvaġġ jitwieled mans.
13Jekk iddawwar lejn Alla qalbek,
u tiftaħ lejh idejk;
14jekk tbiegħed minn idejk il-ħażen,
u ma tħallix jgħammar id-dnewwa f’darek,
15tkun tista’ terfa’ wiċċek bla mistħija,
tkun fis-sod u ma jkollokx mniex tibża’.
16Għax int tinsieh in-niket tiegħek,
jew tiftakru bħal ilma li għadda.
17Aktar mid-dawl ta’ nofsinhar tkun tiddi ħajtek;
għalik id-dlam ikun bħas-sebħ.
18Moħħok mistrieħ għall-ġejjieni tiegħek,
hemm x’jagħmillek tajjeb u torqod fil-kwiet.
19Timtedd u ħadd ma jqajmek,
u ħafna jżiegħlu bik.
20Iżda l-ħżiena jinfnewlhom għajnejhom,
ma jkollhomx aktar fejn jagħtu rashom,
il-mewt biss it-tama tagħhom.”
Who We AreWhat We EelieveWhat We Do
2025 by iamachristian.org,Inc All rights reserved.
