BIN SIRAK 2 - Maltese Bible with DC

Kapitlu 2Il-biża’ tal-Mulej waqt il-prova

1Ibni, jekk tiġi biex taqdi lill-Mulej

ħejji ruħek għat-tiġrib.

2Kun sinċier f’qalbek u żomm sħiħ,

biex ma tinfixilx fi żmien l-għawġ.

3Ingħaqad miegħu u titilqux,

u tikber fil-ġieħ fi tmiem ħajtek.

4Kulma jiġi fuqek ilqgħu,

u żomm sħiħ fit-tibdil li jumiljak.

5Għax id-deheb jippruvawh fin-nar,

u n-nies magħżula fil-forn tal-umiljazzjoni.

6Afda fil-Mulej u jieqaf miegħek,

żomm triqatek dritti u ittama fih.

7Intom li tibżgħu mill-Mulej stennew ħnientu,

u toħorġux mit-triq li ma tmorrux taqgħu.

8Intom li tibżgħu mill-Mulej afdaw fih,

u ma jonqoskomx il-ħlas tagħkom.

9Intom li tibżgħu mill-Mulej, ittamaw fi ħwejjeġ tajba,

fl-hena ta’ dejjem u fil-ħniena.

10Ħarsu lejn il-ġenerazzjonijiet ta’ dari u araw:

min qatt ittama fil-Mulej u kellu għax jistħi?

Jew min żamm fil-biża’ tiegħu, u l-Mulej ħallieh waħdu?

Jew min sejjaħlu, u l-Mulej ma tax kasu?

11Għax il-Mulej tiġih ħasra u jħenn,

jaħfer id-dnubiet u jsalva fi żmien l-għawġ.

12Ħażin għalihom ta’ qalbhom maqtugħa u ta’ idejhom mitluqa,

u għall-midneb li jgħix ħajja doppja.

13Ħażin għalikom li qtajtu qalbkom għax bla fidi;

b’hekk ma jkollux fejn jistkenn.

14Ħażin għalikom li tliftu s-sabar!

X’se tagħmlu meta jistħarriġkom il-Mulej?

15Dawk li jibżgħu mill-Mulej ma jiksrux kelmtu,

u dawk li jħobbuh iħarsu triqatu.

16Dawk li jħobbu l-Mulej ifittxu li jogħġbuh,

u dawk li jħobbuh huma mimlija bil-Liġi tiegħu.

17Dawk li jibżgħu mill-Mulej iħejju ruħhom,

u quddiemu jċekknu ruħhom.

18Nintelqu f’idejn il-Mulej

u mhux f’idejn il-bniedem,

għax bħalma hu l-kobor tiegħu,

hekk ukoll il-ħniena tiegħu.