PROVERBJI 4 - Maltese Bible with DC

Kapitlu 4Tagħlim ta’ missier

1Isimgħu, uliedi, it-tagħlim ta’ missier,

qisu li titgħallmu l-għaqal;

2għax jien tagħlim tajjeb nagħtikom;

għalhekk tinsewx twissijieti.

3Kont għadni tifel ma’ missieri,

żgħir u waħdieni taħt għajnejn ommi.

4Hu kien jgħallimni u jgħidli:

“Żomm kliemi b’qalbek kollha;

ħares il-kmandamenti tiegħi, u jkollok il-ħajja.

5Ikseb l-għerf, ikollok id-dehen,

tinsihomx, u titwarrabx minn kliem fommi.

6Twarrbux minnek, u hu jżommok,

ħobbu, u hu jieqaf miegħek.

7L-aqwa ħaġa, li tikseb l-għerf;

ikseb id-dehen akkost ta’ kollox.

8Għożżu, u hu jżommok fl-għoli,

tgħannaq miegħu, u jkunlek ta’ ġieħ.

9Iqegħedlek fuq rasek kuruna sabiħa,

jitfa’ fuqek tiżjin kollu ġmiel.”

10Isma’ ibni, u ilqa’ kliemi,

u joktru s-snin ta’ ħajtek.

11Jien nurik it-triq tal-għerf,

immexxik fil-mogħdija tas-sewwa.

12Fil-mixi tiegħek ma ssibx xi jfixklek,

u jekk tiġri, ma taqax.

13Żomm mat-tagħlim, u tħallih qatt,

ħarsu sewwa, għax hu ħajtek.

14Taqbadx il-mogħdija tal-ħżiena,

timxix fit-triq ta’ min jagħmel id-deni.

15Aħrabha, tgħaddix minnha;

mur fuq naħa oħra, u ibqa’ sejjer.

16Għax il-ħżiena ma jorqdux, jekk ma jagħmlux id-deni,

itirilhom ngħashom, jekk ma jwaqqgħux lil xi ħadd.

17Huma jieklu ħobż il-ħażen,

u jixorbu nbid il-vjolenza.

18Imma triq it-tajbin bħal dawl iż-żerniq,

li jżid jitqawwa sal-milja tal-jum.

19Triq il-ħżiena bħal dalma kbira,

lanqas biss jilmħu dak li jġegħelhom jaqgħu.

20Ibni, agħti widen għal kliemi,

iftaħ widnejk għal dak li ngħid jien.

21Tħallihomx iwarrbu minn quddiem għajnejk,

żommhom fil-qiegħ ta’ qalbek.

22Għax huma l-ħajja għal min isibhom,

u s-saħħa għal ġismu kollu.

23Ħares lil qalbek bir-reqqa kollha,

għax minnha ġejja l-ħajja.

24Warrab minnek ħażen il-fomm,

biegħed minnek qerq ix-xufftejn.

25Żomm għajnejk dritti quddiemek,

u ħarstek ’il quddiem itfagħha.

26Ara fejn titfa’ riġlek fi triqtek,

u li triqatek kollha jkunu tajba.

27Tgħawwiġx ’l hawn u ’l hemm,

u warrab riġlejk mill-ħażen.