BIN SIRAK 47 - Maltese Bible with DC

Kapitlu 47David

1Warajh qam Natan

jipprofetizza fi żmien David.

2Bħalma jingħażel il-grass mis-sagrifiċċju tas-sliem,

hekk ukoll intgħażel David minn ulied Iżrael.

3Kien jilgħab bl-iljuni bħalkieku gidjien,

u bl-orsijiet bħalkieku ħrief mill-merħla.

4F’żgħożitu ma qatilx ġgant

u neħħa għajb minn fuq il-poplu

meta rafa’ idu b’ċagħka fl-iżbandola

u tafa’ fl-art il-kburija ta’ Gulija?

5Għax sejjaħ lill-Mulej, lill-Għoli,

u tah is-saħħa t’idu l-leminija

biex joqtol bniedem ta’ ħila għall-ġlied,

ħa jgħolli l-qawwa tal-poplu tiegħu.

6Hekk tawh glorja għall-għaxart elef,

u faħħruh huma u jbierku l-Mulej

meta tawh il-kuruna ta’ glorja.

7Għax qered l-għedewwa ta’ madwaru,

u ġieb fix-xejn il-Filistin li kienu kontrih,

u farrak il-qawwa tagħhom sal-lum.

8F’kulma għamel radd ħajr

lill-Qaddis, lill-Għoli, bi kliem ta’ glorja,

u għanna b’qalbu kollha,

u ħabb lil Dak li għamlu.

9U qiegħed għannejja quddiem l-artal

biex iħollu leħenhom b’melodija ħelwa.

10Il-festi tahom il-ġmiel tagħhom,

u sebbaħhom għall-aħħar iż-żminijiet,

biex hekk jingħata t-tifħir

lill-isem qaddis ta’ Alla,

sa minn filgħodu jidwi l-għana fit-tempju.

11Il-Mulej neħħielu dnubietu,

u għollielu għal dejjem qawwietu,

u għamel miegħu patt tas-slaten,

u tah tron ta’ glorja f’Iżrael.Salamun

12Warajh qam iben għaref

u bis-saħħa tiegħu għammar fil-wisa’.

13Salamun kien isaltan f’jiem ta’ sliem;

lilu l-Mulej tah mistrieħ minn kull naħa,

biex jibnilu dar għal ismu,

u jħejjilu tempju għal dejjem.

14Kemm sirt għaref f’żgħożitek!

U bħal xmara kont tfur bid-dehen!

15B’moħħok imraħt fl-art,

imlejtha bi qwiel ta’ ħsieb tqil.

16Ismek wasal sa gżejjer imbiegħda,

u kont maħbub għas-sliem tiegħek.

17Għall-għanjiet, il-qwiel, il-parabboli,

u t-tifsiriet tiegħek, stagħġbu bik l-artijiet.

18F’isem il-Mulej Alla,

li jsejħulu Alla ta’ Iżrael,

ġmajt deheb daqskieku landa,

u mtlejt bil-fidda daqskieku ċomb.

19Imma mbagħad imteddejt maġenb in-nisa,

u sfajt maħkum mill-ġibdiet ta’ ġismek.

20Tebbajt ġieħek

u niġġist nislek;

ġibt għadab fuq uliedek,

u tnikktu minħabba bluhatek:

21saltnatek inqasmet tnejn,

u minn Efrajm ħarġet saltna li ma qagħditx għalik.

22Imma l-Mulej ma jwarrabx ħnientu;

lanqas iħalli xi kelma tiegħu tisfa fix-xejn;

ma jeqridx ulied il-magħżul tiegħu,

u lanqas ma jneħħi ulied dak li ħabbu;

u ħalla fdal lil Ġakobb,

u għal David għerq minn nislu.Reħobogħam

23U Salamun mar jistrieħ ma’ missirijietu,

u ħalla warajh wieħed minn uliedu,

kollu bluha u nieqes mill-għaqal u mid-dehen fost il-poplu,

Reħobogħam, li bi mġibtu qajjem il-poplu kontrih.Ġerobogħam

24Imbagħad, Ġerobogħam bin Nebat, li waqqa ’l Iżrael fid-dnub,

u qiegħed lil Efrajm fit-triq tad-dnub;

dnubiethom kotru għall-aħħar

hekk li keċċewhom minn arthom.

25Fittxew kull xorta ta’ ħażen

sakemm ġie fuqhom ħlashom.