ĠOB 41 - Maltese Bible with DC

Kapitlu 41

1Ara, ġiet fix-xejn it-tama ta’ min ipprova,

sa l-allat marru għal tulhom għad-dehra tiegħu.

2Ma jiħraxx jewwilla xħin wieħed iqajmu?

Min għandu l-ħila jieqaf quddiemu?

3Min tqabad miegħu u ħareġ bis-sliema?

Anqas wieħed mis-sema ’l isfel.

4Għalhekk ma noqgħodx sieket dwar ġismu,

irrid nitkellem fuq saħħtu liema bħalha.

5Min jista’ jċarrat il-libsa ta’ fuqu?

Min ixoqqha l-kurazza doppja tiegħu?

6Min jista’ jiftaħ dawk ix-xatbiet ta’ ħalqu,

imdawrin bi snien li jwerwru?

7Dahru ringieli ta’ tarki,

is-sinsla siġill magħluq.

8Marbutin it-tarki waħda mal-oħra

u ma tgħaddix arja bejniethom.

9Kull waħda mqabbda ma’ seħbitha,

marbuta sew u ma tinqalax.

10L-għatis tiegħu jagħti d-dawl,

għajnejh bħat-tbexbix tal-għodwa.

11Minn ħalqu joħorġu fjammi,

u jittajjar xrar tan-nar.

12Minn imnifsejh joħroġ il-fwar

bħal minn borma tagħli kemm tiflaħ.

13In-nifs tiegħu jqabbad il-ġamar

u jtajjar minnu x-xrar.

14F’għonqu tbejjet is-saħħa,

id-dgħufija taħrab minn quddiemu.

15Il-faldi ta’ laħmu magħquda ħaġa waħda,

marsusa miegħu bla ma jitħarrku.

16Sħiħa daqs blata qalbu,

iebsa daqs mola ta’ mitħna.

17Bil-biża’ li jnissel jitkexkxu l-qawwijin,

jintelqu fl-art imwerwrin.

18Is-sejf li jolqtu xejn ma jagħmillu,

lanqas il-lanza, il-vleġġa u l-ġavellott.

19Il-ħadid jistmah tiben,

u l-bronż għuda mherrija.

20L-ebda vleġġa ma ġġagħlu jaħrab,

il-ħaġar li jwaddbulu jsir fuqu tiben.

21Għalih il-mazza mhix għajr qasba,

hu jiddieħak b’min ixejjirlu l-lanza.

22Żaqqu bil-ponot bħal xaqquf jaqta’,

jifrex it-tajn qisu xatba.

23Iqalla’ l-qiegħ bħal borma tagħli,

jixkuma l-baħar bħal griġjol.

24Iħalli mnejn jgħaddi tranja bajda,

il-qiegħ tistħajlu talla’ x-xagħar qotni.

25M’hawnx fid-dinja ieħor bħalu

maħluq ma jibża’ minn ħadd.

26Iħares f’wiċċ kull min hu kburi;

hu sultan fuq il-bhejjem selvaġġi kollha.”