PROVERBJI 21 - Maltese Bible with DC

1Qalb is-sultan nixxiegħa ilma f’id il-Mulej;

hu jmexxiha kull fejn jogħġbu.

2Kulma jagħmel il-bniedem hu safi f’għajnejh,

imma l-Mulej jiżinlu qalbu.

3Li tagħmel il-ħaqq u s-sewwa

jogħġob lill-Mulej aktar mis-sagrifiċċju.

4Għajnejn merfugħa u qalb imkabbra;

dan hu s-sinjal tal-ħżiena, u hu dnub.

5Min hu bil-għaqal jaħsibha tajjeb u jirnexxilu;

imma min jgħaġġel jiġi fil-bżonn.

6Min jaħżen il-ġid bil-qerq ta’ lsienu

bħal duħħan li jgħib u bħal xibka tal-mewt.

7Il-vjolenza tal-ħżiena għad teqridhom,

għax ma jridux jagħmlu s-sewwa.

8Imgħawġa hi mġibet il-midneb,

imma dritt għemil il-ġust.

9Aħjar tgħix f’rokna fuq bejt,

milli f’dar kbira ma’ mara ġellieda.

10Qalb il-ħażin tixtieq id-deni;

m’għandux ħniena lanqas minn ħbiebu.

11Bit-twiddib tal-vjolenti jitgħallem iċ-ċkejken;

u l-għaref bit-tagħlim ikattar għerfu.

12Alla l-ġust iħares lejn dar il-ħażin;

il-ħżiena jitfagħhom fil-ħsara.

13Min jagħlaq widnejh għall-għajta tal-fqir,

ħadd ma jwieġbu meta jgħajjat hu.

14Għotja bil-moħbi ttaffi l-korla,

rigal minn taħt iberred saħna kbira.

15Jifraħ il-ġust meta jsir ħaqq tajjeb,

imma jibżgħu dawk li jagħmlu l-ħażen.

16Min joħroġ ’il barra mit-triq tal-għaqal,

isib postu fil-ġemgħa tal-mejtin.

17Min iħobb ix-xalar jaqa’ fil-faqar;

min iħobb l-inbid u ikel bnin qatt ma jistagħna.

18Iħallas il-ħażin għall-fidwa tal-ġust;

u t-traditur għal min hu leali.

19Aħjar tgħix waħdek f’deżert,

milli ma’ mara ġellieda u inkejjuża.

20Teżori prezzjużi u fwieħa jibqgħu f’dar l-għaref,

imma l-iblah iberbaq kollox.

21Min jimxi bil-ġustizzja u t-tjieba,

ikollu ħajja u ġieħ.

22L-għaref jaħbat għal belt ta’ nies qawwija,

u jġarraf is-swar, il-mistrieħ ta’ moħħhom.

23Min irażżan fommu u lsienu,

iħares mill-għawġ lilu nnifsu.

24Arroganti jissejjaħ min hu kburi u fieragħ,

min hu mkabbar u mimli bih innifsu.

25Ix-xewqa tal-għażżien għall-mewt twasslu,

għax ma jridx imidd idejh għax-xogħol.

26Il-jum kollu l-ħażin jixtieq aktar,

imma l-ġust jagħti b’idejh miftuħa.

27Is-sagrifiċċju tal-ħżiena jistmellu l-Mulej;

kemm aktar meta jsir b’fehma ħażina.

28Min jixhed il-falz jintilef;

iżda min joqgħod għas-sewwa jżomm sħiħ.

29Il-ħażin wiċċu sfiq,

u t-tajjeb ħsiebu f’għemilu.

30La l-għerf, la d-dehen u lanqas il-fehma

ma jiswew xi ħaġa quddiem il-Mulej.

31Jista’ jkun lest iż-żiemel għal nhar it-taqbida,

imma r-rebħa tiġi mingħand il-Mulej.