SOFONIJA 2 - Maltese Bible with DC

Kapitlu 2Stedina għall-konverżjoni

1Inġemgħu, inġabru, ġens bla mistħija,

2qabel ma tkunu misħuqin bħall-karfa

wara jum xogħol;

qabel ma l-korla mħeġġa tal-Mulej tilħaqkom;

qabel ma jum il-korla tal-Mulej

jasal għal fuqkom.

3Fittxu l-Mulej ilkoll,

intom, l-umli tal-art,

li tagħmlu ordnijietu;

fittxu l-ġustizzja, fittxu l-umiltà:

biex forsi f’jum il-korla tal-Mulej

ikollkom fejn tistkennu.L-għadu mill-Punent: il-Filistin

4Għax Gaża għad tkun ħerba,

u Askalon deżert;

Asdod titkeċċa ’l barra f’nofsinhar,

Għekron titqaċċat.

5Ħażin għalikom, nies ta’ qrib il-baħar,

ġens tal-Keretin!

Din hija kelmet il-Mulej kontrikom:

“Għad inbaxxik, art tal-Filistin,

neqirdek qerda,

hekk li ma jibqa’ ħadd min jgħammar fik,

6u ssir mergħat, fejn biss rgħajja jirgħu,

art ta’ qrib il-baħar,

u mnadar għall-imrieħel.”

7U ssir tal-bqija ta’ dar Ġuda x-xtajta,

u jirgħu fiha,

imbagħad għal filgħaxija

jimteddu ġewwa d-djar ta’ Askalon.

Għax il-Mulej iżurhom, Alla tagħhom,

u jreġġagħhom għal li kienu.

L-għadu mil-Lvant: Mowab u Għammon

8“Smajt lil Mowab imaqdar,

smajt iż-żebliħ ukoll ta’ wlied Għammon,

kif maqdru l-poplu tiegħi

u tkabbru kontra arthom.

9Għalhekk, daqs kemm jien ħaj,”

oraklu tal-Mulej tal-eżerċti,

Alla ta’ Iżrael,

“għax bħal Sodoma jiġri lil Mowab,

u bħal Gomorra lil ulied Għammon:

isiru għalqa bil-ħurrieq miżgħuda,

u moxa kollha melħ,

ħerba għal dejjem.

Fdal il-poplu tiegħi

jeħduhom bi priża;

u l-bqija ta’ ġensi

jiksbuhom bħala wirt.”

10Jiġrilhom dan minħabba t-tkabbir tagħhom,

għax huma maqdru u tkabbru

kontra l-poplu tal-Mulej tal-eżerċti.

11Tal-biża’ jkun għalihom il-Mulej,

għax kollha jtemmhom lill-allat tal-art,

jinxteħtu jqimuh, kulħadd fi mkienu,

il-gżejjer kollha tan-nazzjonijiet.

L-għadu min-Nofsinhar: l-Etjopja

12Intom ukoll, ja poplu ta’ Kus:

“Ikunu dawn minfuda mis-sejf tiegħi.”L-għadu mit-Tramuntana: l-Assirja

13U jifrex idu lejn it-Tramuntana:

u jeqred lil Assirja;

u jagħmel ħerba waħda minn Ninwè,

art niexfa bħad-deżert.

14Ġo nofsha mbagħad jimteddu fl-art

l-imrieħel u bhejjem ta’ kull ġens:

sal-pellikan u sal-qanfud jgħammru

fil-kapitelli tagħha;

il-barbaġann fit-tieqa jsamma’ leħnu,

l-għorab fuq l-għatba,

għaliex l-injam taċ-ċedru nqala’ minnha.

15Din hija l-belt ferrieħa u b’moħħ mistrieħ,

li f’qalbha kienet tgħid, “Jien biss, ħadd ħliefi”!

Kif saret ħerba, fejn jimteddu l-bhejjem!

Kull min minn ħdejha jgħaddi

jaqbad isaffar u idu jxejjer lejha.