PROVERBJI 11 - Maltese Bible with DC

1Miżien falz jobogħdu l-Mulej

imma jogħġbu l-użin tajjeb.

2Fejn tidħol il-kburija, jidħol l-għajb;

imma l-umli jkollhom l-għerf.

3L-onestà tmexxi n-nies sewwa,

imma l-brikkuni jinqerdu bit-tagħwiġ tagħhom.

4Għal xejn ma jiswa l-ġid f’jum l-għadab,

imma l-ġustizzja teħles mill-mewt.

5Il-ġustizzja lit-tajbin tħarsilhom triqthom,

imma l-ħażin bi ħżunitu jaqa’.

6Il-ġustizzja tan-nies sewwa teħlishom,

imma l-brikkuni f’xewqathom jinqabdu.

7Malli jmut il-ħażin, ma jibqagħlux tama,

u xewqat il-ħżiena jintemmu fix-xejn.

8Il-bniedem ġust jinħeles mill-għawġ,

u minfloku l-ħażin jintefa’ fih.

9Bi kliemu l-ħażin jagħmel ħsara ’l għajru,

imma l-ġusti bil-għaqal jinħelsu.

10B’ġid il-ġusti tifraħ il-belt,

u tgħajjat bil-ferħ għall-qerda tal-ħżiena.

11Bil-barka tat-tajbin tinbena l-belt,

imma tiġġarraf b’fomm il-ħżiena.

12Min hu bla moħħ imaqdar ’l għajru,

min hu bil-għaqal joqgħod kwiet.

13Min ilablab jikxef ħwejjeġ moħbija,

imma min hu ta’ min jafdah iżomm sigriet.

14Fejn m’hemmx min imexxi sewwa jaqa’ l-poplu;

fejn hemm ħafna mexxejja tajba, hemm il-kwiet.

15Min jagħmel tajjeb għal ħaddieħor hu jbati;

min jobgħod jirhan ikun fiż-żgur.

16Mara ħelwa ġieħ ikollha;

mara għadu tas-sewwa t-tmaqdir.

L-għażżenin jiftaqru,

imma l-beżlin jistagħnu.

17Min hu ħanin ġid lilu nnifsu jagħmel,

imma ħsara jġib fuqu nnifsu l-kiefer.

18Il-ħażin ħlasu jkun fieragħ,

imma min jiżra’ s-sewwa qligħ tajjeb ikollu.

19Min iżomm mas-sewwa jkollu l-ħajja,

imma min jimxi bil-ħażen jimxi lejn il-mewt.

20Nies ta’ qlub mgħawġa jistmellhom il-Mulej,

imma jitgħaxxaq b’dawk li triqthom dritta.

21Oqgħod żgur: il-ħażin ma jeħlishiex;

imma wlied il-ġust meħlusa jkunu.

22Bħal ħolqa tad-deheb fi mnieħer ħanżir,

hi mara sabiħa imma bla għaqal.

23It-tama tat-tajbin fil-ġid tintemm,

imma l-ħżiena ħlief qerda m’għandhomx jistennew.

24Hawn min iqassam minn ġidu u aktar jistagħna;

u hawn min irekken u jgħix ta’ fqir.

25Min jagħti bil-qalb ikollu l-barka,

u min ixabba’ l-oħrajn ikollu bix-xaba’.

26Min jaħbi l-qamħ jisħtuh in-nies,

imma ’l dak li jbigħu jberkuh.

27Min iħabrek għall-ġid ikun milqugħ tajjeb,

imma min ifittex id-deni, deni jsib.

28Min iserraħ fuq ġidu jispiċċa biex jaqa’,

imma l-ġusti bħal werqa jħaddru.

29Min iħarbat daru jiret ir-riħ,

u l-iblah isir qaddej l-għaqli.

30Il-frott tal-ġust hu siġra tal-ħajja,

imma d-dnewwa tneħħi l-ħajja.

31Jekk il-ġust jitħallas fuq din l-art,

kemm aktar il-midneb u l-ħażin!