PROVERBJI 22 - Maltese Bible with DC

Kapitlu 22

1Aħjar isem tajjeb minn ħafna ġid,

aħjar fama tajba mill-fidda u d-deheb.

2L-għani u l-fqir f’dan huma xorta waħda;

li t-tnejn il-Mulej għamilhom.

3Min hu bil-għaqal jara l-għawġ u jwarrab;

min hu moħħu ħafif jidħol fih u jħallas għalih.

4Min jiċċekken u jibża’ mill-Mulej,

jieħu bi ħlasu għana, ġieħ u ħajja.

5Triq il-ħażin hi kollha xewk u għawġ;

min jgħasses fuqu nnifsu jitbiegħed minnhom.

6Ħarreġ tifel jimxi fit-triq it-tajba;

ma joħroġx minnha lanqas meta jixjieħ.

7L-għani jaħkem fuq il-fqir,

u min jissellef jaqa’ f’idejn min silfu.

8Min jiżra’ d-dnewwa jaħsad l-għawġ,

u ħatar għadbu jiġi fix-xejn.

9Min hu qalbu tajba jkun imbierek,

għax hu jaqsam ħobżu ma’ min hu fqir.

10Warrab l-arroganti u jieqaf it-tilwim,

u jintemm il-ġlied u t-tagħjir.

11Il-Mulej iħobb lil min hu qalbu safja;

min jitkellem bil-ħlewwa jogħġob lis-sultan.

12Il-Mulej iħares it-tagħlim,

u jxejjen kliem il-qarrieq.

13L-għażżien jgħid: “Hemm iljun hemm barra;

jekk noħroġ joqtolni f’nofs it-triq.”

14Kliem il-mara żienja bħal bir bla qiegħ;

fih jaqa’ min għandu l-Mulej kontrih.

15Il-bluha b’għeruqha fil-qalb ta’ kull tifel;

bis-saħħa tat-twiddib taqlagħhielu ’l barra.

16It-tagħkis tal-fqir jista’ jiswielu ta’ ġid;

min jagħti lill-għonja jiġi fil-bżonn.

Ġabra oħra ta’għajdut

17Agħti widen u isma’ kliem l-għorrief,

u iftaħ moħħok għal tagħlimi.

18Ikun jaqbillek iżżommhom ġo fik,

biex issibhom dejjem lesti f’fommok.

19Ħa ngħallmek illum triqat il-Mulej,

biex fih tkun it-tama tiegħek.

20Ktibtlek jien tletin proverbju,

kollhom pariri u tagħlim,

21biex nurik it-tajjeb u s-sewwa,

ħa tkun taf twieġeb tajjeb lil min bagħtek.

22Tisraqx il-fqir għax hu fqir,

u taħqarx l-imsejken fil-qorti;

23għax il-Mulej jiddefendi l-kawża tagħhom,

u jeqred lil dawk li jridu jeqirduhom.

24Tkunx ħabib ta’ min jinkorla,

tagħmilhiex ma’ min jisħon malajr,

25biex ma tidrax tagħmel bħalu,

u ssib ruħek fil-għawġ.

26Tkunx minn dawk li jagħmlu tajjeb għal ħaddieħor,

tidħolx garanti għad-djun tiegħu;

27għax jekk ma jkollokx biex tħallas,

sa friexek jeħdulek minn taħtek.

28Tneħħix il-ġebel qadim ta’ bejn għalqa u oħra,

li missirijietek qegħduhom b’sinjali.

29Qatt rajt wieħed imħarreġ fis-sengħa tiegħu?

Dan mas-slaten issibu,

u mhux ma’ nies bla isem ta’ xejn.