MIKEA 2 - Maltese Bible with DC

Kapitlu 2Kontra n-negozju inġust

1Ħażin għalihom dawk li jfasslu l-ħsara,

dawk li jsawru d-deni fuq soddithom!

U jagħmluh mas-sebħ filgħodu,

għax idejhom għandhom is-setgħa.

2Jekk jitlebilbu għall-għelieqi, jisirquhom;

jekk għad-djar, jaħtfuhom;

jagħmlu l-vjolenza fuq raġel u daru,

fuq is-sid u ġidu.

3Għalhekk dan jgħid il-Mulej:

“Ara, kontra din ir-razza ta’ nies

qed infassal ħsibijiet ta’ ħsara,

li ma teħilsux għonqkom minnha,

u ma tibqgħux timxu raskom merfugħa,

għax ikun żmien ħażin.”

4Dakinhar tiġu f’ilsien in-nies,

jgħannulkom għanja tal-biki u jgħidulkom:

“Aħna misruqin serqa għall-aħħar:

sehem il-poplu tiegħu qiegħed jitqies bil-ħbula,

m’hemm ħadd biex iroddhulu lura;

ir-raba’ tagħna sar sehem min seraqna.”

5Għalhekk għalikom ma jkunx hemm

min jixħet il-ħabel tal-qjies bix-xorti

fil-ġemgħa tal-Mulej.

Il-profeta li jhedded bil-ħsara

6“Ixxerrdux xnigħat!” ixandru huma;

“Aħbarijiet bħal dawn m’għandhomx jixxandru!

Ebda għajb mhu se jaqa’ fuqna.”

7Jaqaw id-dar ta’ Ġakobb misħuta?

Jaqaw il-Mulej tilef sabru?

Dawn huma għemejjel tiegħu?

Kliemu mhuwiex kliem ta’ ġid

ma’ min jimxi dritt?”

8Intom li qomtu bħala għedewwa

għall-poplu tiegħi,

lill-bniedem fis-sliem

tneżżgħuh mill-mantar tiegħu,

lil min ikun għaddej b’rasu mistrieħa,

bħallikieku priża tal-gwerra.

9In-nisa tal-poplu tiegħi tgerrxuhom

minn djarhom fejn ikunu għal qalbhom.

Lil uliedhom tneħħulhom

il-ġieħ li jien tajthom għal dejjem.

10“Qumu u morru, għidulhom,

dan mhux post il-mistrieħ!”

Għal kull ħaġa ta’ xejn

tieħdu rahan bla qjies.

11Jekk jgħaddi bniedem fieragħ,

kollu gideb u qerq,

u jgħid: “Inħabbarlek inbid u xorb,”

dan isir il-profeta ta’ dan il-poplu.Wegħda ta’ tiġdid

12Niġbrok, Ġakobb, kollok kemm int,

niġbor il-fdal ta’ Iżrael,

nqegħedhom flimkien bħal nagħaġ f’maqjel,

bħal merħla f’nofs ta’ mergħa,

geġwiġija ta’ nies, bla ma jibżgħu minn ħadd.

13Jitla’ quddiemhom dak li jiftaħ it-triq,

jiftaħ it-triq, jgħaddu mill-bieb u joħorġu minnu,

u jgħaddi s-sultan tagħhom quddiemhom,

il-Mulej fir-ras tagħhom.