1Għanja. Salm ta’ Asaf.
2O Alla, la torqodx,
tiqafx u tiskotx, o Alla!
3Għax, ara, qamu l-għedewwa tiegħek,
dawk li jobogħduk refgħu rashom.
4Jiftiehmu bejniethom kontra l-poplu tiegħek,
jingħaqdu kontra l-poplu l-għażiż tiegħek.
5U jgħidu: “Ejjew, ħa nwarrbuhom minn fost il-ġnus;
ma jissemmiex iżjed isem Iżrael!”
6Huma ngħaqdu fehma waħda,
u għamlu patt bejniethom kontra tiegħek.
7Ir-razez ta’ Edom u l-Ismagħelin,
Mowabin u Ħagarin,
8Gebal, Għammon u Għamalek,
il-Filistja man-nies ta’ Tir;
9Assur ukoll ingħaqad magħhom,
saru d-driegħ qawwi ta’ wlied Lot.
10Imxi magħhom kif imxejt ma’ Midjan u ma’ Sisera,
ma’ Ġabin ħdejn il-wied ta’ Kison,
11li nqerdu ħdejn Għajn-dor,
saru bħal demel tal-art.
12Agħmel lill-kbarat tagħhom bħal Għoreb u bħal Żeb;
bħal Żebaħ u Salmunna lill-kapijiet tagħhom ilkoll.
13Għax ilkoll kienu qalu: “Ħa nieħdu taħt idejna
l-aħjar oqsma tal-poplu ta’ Alla.”
14Alla tiegħi, agħmilhom bħal tromba tar-riħ,
bħal karfa li ttir maż-żiffa,
15bħal nar li l-bosk iqabbad,
bħal ħuġġieġa li tkebbes l-għoljiet.
16Hekk ilħaqhom bit-tempesta tiegħek,
werwirhom bir-riefnu tiegħek.
17Iksilhom wiċċhom bil-mistħija,
li jaslu biex ifittxu ismek, Mulej.
18Jistħu u jinfixlu darba għal dejjem,
jitħawdu sa ma jintilfu.
19Biex jagħrfu li Jaħweh hu ismek,
li int waħdek l-Għoli fuq l-art kollha.
Who We AreWhat We EelieveWhat We Do
2025 by iamachristian.org,Inc All rights reserved.
