PROVERBJI 17 - Maltese Bible with DC

1Aħjar loqma ħobż niexfa bis-sliem,

minn dar mimlija bl-ikel u l-ġlied.

2Qaddej bil-għaqal jikkmanda iben bla ġieħ,

u jaqsam il-wirt mal-aħwa.

3Il-fidda tissaffa fil-griġjol u d-deheb fin-nar,

imma qlub il-bnedmin iġarrabhom il-Mulej.

4Il-ħażin iħobb jisma’ kliem il-qerq,

u l-giddieb jagħti widen għall-ilsien ħażin.

5Min jidħak bil-fqir ikasbar lil min ħalqu;

min jifraħ bid-deni jħallas għalih.

6Ulied l-ulied huma l-ġieħ tax-xjuħ,

u l-kburija tal-ulied missirijiethom.

7Il-kliem sabiħ ma jixraqx lil min hu iblah;

kemm aktar ma jixraqx il-gideb lil min hu kbir.

8Rigal min ixaħħam bħal seħer fl-għajnejn,

bih wieħed jirnexxi kull fejn imur.

9Min jistor il-ħtija jżomm l-imħabba,

imma min itenniha jikser il-ħbiberija.

10Ċanfira waħda tolqot aktar lill-għaqli,

minn mitt daqqa lill-iblah.

11Il-ħażin iqum kontra min għandu s-setgħa,

imma mbagħad messaġġier aħrax jintbagħat għalih.

12Aħjar tħabbat wiċċek ma’ orsa li ħadulha l-frieħ,

milli mal-iblah fis-siegħa ta’ bluhatu.

13Min irodd id-deni għall-ġid,

id-deni ma jwarrabx minn daru.

14Il-bidu tal-ġlied bħal żbroff tal-ilma,

warrab qabel tibda xi ġlieda.

15Kemm min jeħles il-ħażin u kemm min jikkundanna l-ġust,

it-tnejn jistmellhom il-Mulej.

16X’jiswew il-flus f’id l-iblah?

Se jixtri bihom l-għerf, jekk m’għandux moħħ?

17Il-ħabib iħobbok kull ħin,

bħal ħuk imwieled għal żmien l-hemm.

18Min hu bla moħħ jidħol garanti,

u jagħmel tajjeb għal ħaddieħor.

19Min iħobb il-ġlied iħobb id-dnub;

min jagħmel bieb għoli jistieden it-tiġrif.

20Il-qalb qarrieqa ma ssibx kwiet,

u l-ilsien ħażin jiġi fl-għali.

21Missier l-iblah għali jkollu,

m’għandux biex jifraħ b’iben bla moħħ.

22Qalb ferħana tagħti s-saħħa,

ruħ imnikkta tmewwet il-ġisem.

23Il-ħażin jieħu r-rigali bil-moħbi,

biex ma jaqtax il-ħaqq skont is-sewwa.

24L-għaqli jżomm l-għerf quddiem għajnejh,

imma l-iblah idawwar għajnejh kullimkien.

25Iben iblah hu l-għali ta’ missieru,

u l-imrar ta’ ommu li wilditu.

26Mhux sewwa tikkastiga ’l min hu bla ħtija;

ħażin li ssawwat nies ta’ ġieħ.

27Min għandu l-għerf kliemu meqjus,

min għandu l-għaqal moħħu kalm.

28Lill-iblah ukoll, jekk jiskot, jaħsbuh għaref,

u b’għaqli jgħodduh, jekk iżomm fommu sieket.