IL-KTIEB TAL-GĦERF 4 - Maltese Bible with DC

Kapitlu 4

1Aħjar ħajja bla wlied, imma mżejna bil-virtù,

ma tmut qatt it-tifkira tagħha,

għax hi stmata minn Alla, u mill-bnedmin ukoll.

2Fejn hemm il-virtù, il-bnedmin jimxu magħha,

u jixtiquha, jekk titbiegħed minnhom.

F’kull żmien tgħaddi msebbħa bil-ġieħ,

rebbieħa fi ġlieda għall-kuruna li ma tidbielx.

3Imma għal xejn ma jiswa n-nisel kotran tal-ħżiena,

ulied iż-żina tagħhom ma jrabbux għeruq fil-fond,

u lanqas iserrħu fuq is-sod.

4Jistgħu għal xi żmien iħaddru l-friegħi tagħhom;

iżda huma bla saħħa u jixxejru mar-riħ,

u bil-qawwa tar-rjieħ mill-għeruq jinqalgħu.

5Jitqaċċtu l-friegħi tagħhom qabel iż-żmien,

il-frott tagħhom ma jsirx, mhux tajjeb għall-ikel,

u għal xejn ma jiswa.

6Hekk ulied l-imħabba ħażina,

jixhdu għall-ħażen ta’ min wilidhom,

meta jidhru għall-ħaqq.

Il-mistrieħ tal-ġust

7Imma l-ġust, imqar jekk imut żgħir, ikun fil-mistrieħ;

8għax ix-xjuħija ta’ ġieħ mhijiex dik tal-għomor twil,

u lanqas titqies min-numru tas-snin.

9Ix-xjuħija tal-bniedem hi l-għaqal tiegħu,

u l-għomor twil hu l-ħajja bla tebgħa.

10Wieħed kien jgħix fost il-midinbin,

imma kien jogħġob ’l Alla;

għalhekk Alla ħabbu u ħadu miegħu.

11Ħatfu biex il-ħażen ma jħassarlux moħħu,

jew il-qerq iqarraq b’ruħu.

12Għax is-seħer tal-ħażen idallam it-tajjeb,

u rwiefen il-passjoni jdawru l-moħħ bla qerq.

13Fi żmien qasir laħaq il-milja tal-perfezzjoni ta’ ħajja twila.

14Billi kien jogħġob lill-Mulej,

hu ħadu malajr minn qalb il-ħażen.

In-nies rawh dan, imma ma fehmux,

u lanqas biss ħasbu

15li tjieba u ħniena Alla juri mal-magħżulin tiegħu,

u li jidħol għat-twajbin tiegħu.

16Il-bniedem ġust, imqar wara mewtu,

jikkundanna l-ħżiena li jibqgħu ħajjin;

u ż-żagħżugħ, li jilħaq il-perfezzjoni fi żmien qasir,

jikkundanna ’l min jixjieħ fid-dnub.

17Għax in-nies jaraw tmiem min hu għaref,

imma lill-ġust ma jifhmux xi jrid minnu l-Mulej,

jew għala qiegħdu fis-sod.

18Dan kollu rawh, imma maqdruh;

iżda bihom il-Mulej jiddieħak.

19Wara mewthom bla ġieħ ikun ġisimhom,

u ħaġa tad-daħk fost il-mejtin għal dejjem:

għax hu jwaddabhom rashom ’l isfel, ilkoll imbikkma,

u jaqtagħhom minn riġlejhom.

Huma jkunu mitlufin għalkollox,

ikunu kollhom dwejjaq;

u titħassar it-tifkira tagħhom.Jum il-ħaqq

20F’jum il-kont ta’ dnubiethom jersqu mbeżżgħa,

ikkundannati f’wiċċhom minn ħtijiethom.