SALMI 53 - Maltese Bible with DC

Salm 53Il-bniedem mingħajr Alla

1Għall-mexxej tal-kor. Fuq “Maħalat”. Maskil. Ta’ David.

2Jgħid l-iblah f’qalbu: “M’hemmx Alla!”

Tħassru l-bnedmin, għamlu ħwejjeġ ta’ min jistmellhom;

m’hemm ħadd li jagħmel is-sewwa.

3Alla mis-sema jittawwal fuq il-bnedmin,

biex jara jekk hemmx min hu għaqli,

min ifittex lil Alla.

4Ilkoll intilfu, ilkoll flimkien tħażżnu;

ħadd ma jagħmel is-sewwa, anqas biss wieħed.

5Ma jintebħux dawk kollha li jagħmlu l-ħażen,

dawk li qatt ma jsejħu lil Alla?

li jaħtfu l-poplu tiegħi kif wieħed jaħtaf il-ħobż,

u lil Alla ma jsejħux?

6Biża’ kbir waqa’ fuqhom,

bla ma kellhom għalfejn;

għax Alla kissrilhom għadamhom

lil dawk li dawruk;

tħawdu, għax Alla telaqhom.

7Min iġib minn Sijon il-ħelsien ta’ Iżrael?

Meta jerġa’ jqajjem Alla l-poplu tiegħu,

jifraħ Ġakobb, jithenna Iżrael.