EŻEKJEL 19 - Maltese Bible with DC

Kapitlu 19L-allegorija tal-ljun

1U inti għanni għanja tal-biki

għall-prinċpijiet ta’ Iżrael

2u

għidilhom:

X’iljuna kien fiha ommok

fost il-ljuni!

Imteddet qalb il-ljuni ż-żgħar,

u rabbiet il-ġriewi tagħha.

3Minn dawn il-ġriewi rawmet wieħed,

sakemm kiber f’daqsxejn ta’ ljun:

tgħallem jaħtaf il-priża,

u jiekol in-nies.

4U l-ġnus għajtu u nġemgħu kontrih,

u nqabad fil-ħofra tagħhom.

Imbagħad ħaduh bil-ħoloq fl-art tal-Eġittu.

5U meta rat li stenniet għal xejn,

li tamitha sfat fix-xejn,

ħadet ieħor minn ġriwitha,

u minnu rawmet iljun żgħir.

6U beda jħuf qalb il-ljuni,

u kiber f’daqsxejn ta’ ljun;

tgħallem jaħtaf il-priża,

u beda jiekol in-nies

7Ġarr il-priża lejn għerienu,

u ħarbat bliethom.

Twerwer il-pajjiż b’kulma kien fih

għall-ħoss tat-tgargir tiegħu.

8Imbagħad il-ġnus daru għalih,

mill-ibliet kollha ta’ madwar,

firxu xbiekhom fuqu,

u nqabad f’ħofrithom.

9Għalquh ġo gaġġa marbut bil-ktajjen,

u ħaduh għand is-sultan ta’ Babilonja,

u dan għalqu f’fortizza

biex għajjatu aktar ma jinstamax,

fuq l-għoljiet ta’ Iżrael.

L-allegorija tad-dielja

10Ommok kienet bħal dielja f’qasam dwieli,

imxettla ħdejn l-ilma kotran;

kienet għammiela u kollha friegħi,

minħabba l-ħafna ilma.

11Ħareġ minnha żarġun b’saħħtu,

u sar xettru ta’ sultan,

intrefa’ ’l fuq minn bejn il-friegħi,

u fl-għoli qalb il-friegħi folti kont tarah.

12Imma d-dielja qaċċtuha f’saħna,

u mal-art meddewha.

Ir-riħ mil-Lvant nixxfilha l-frott;

iż-żarġun b’saħħtu qaċċtuhulha,

nixef u ħarqu n-nar.

13U issa tinsab imħawla fid-deżert,

f’art għatxana u taħraq nar.

14Miż-żarġun ħareġ in-nar,

u l-friegħi u l-frott kililha.

Ma baqa’ ebda żarġun b’saħħtu,

ebda xettru għal sultan.

Din hi għanja ta’ lamentazzjoni

u tkun għanja tal-vistu.