SALMI 78 - Maltese Bible with DC

Salm 78Tagħlim mill-istorja ta’ Iżrael

1Maskil. Ta’ Asaf.

Poplu tiegħi, agħtu widen għal-liġi tiegħi,

iftħu widnejkom għal kliem fommi.

2Niftaħ fommi biex inxandar kliem l-għerf;

nitkellem fuq ħwejjeġ moħbija mill-qedem.

3Dak li smajna u tgħallimna,

dak li qalulna missirijietna,

4aħna ma naħbuhx lil uliedhom,

iżda nxandruh lin-nisel ta’ warajhom:

tifħir il-Mulej u l-qawwa tiegħu,

u l-għeġubijiet li għamel.

5Waqqaf drawwa b’tifkira għall-poplu ta’ Ġakobb,

għamel liġijiet għal Iżrael;

u ordna lil missirijietna

biex jgħallmuhom lil uliedhom,

6ħalli jkun jafhom in-nisel ta’ warajhom;

u l-ulied li jitwieldu minnhom

jgħarrfuhom ukoll lil uliedhom,

7biex f’Alla jqiegħdu t-tama tagħhom;

ma jinsewx l-għemejjel ta’ Alla,

iżda jħarsu l-kmandamenti tiegħu;

8u ma jkunux bħal missirijiethom,

nies ta’ ras iebsa li b’xejn ma tisma’,

li qalbhom kienet bla mistrieħ,

u ruħhom lejn Alla infidila.

9Ulied Efrajm, imħarrġa fl-ark,

treġġgħu lura f’jum it-taqbida;

10ma ħarsux il-patt ta’ Alla,

ma ridux jimxu fuq il-liġi tiegħu.

11Insew l-għemejjel tiegħu

u l-għeġubijiet li kien uriehom:

12l-għeġubijiet li għamel quddiem missirijiethom

f’art l-Eġittu, fir-raba’ ta’ Sogħan.

13Feraq il-baħar biex għaddiehom minnu,

l-ilmijiet bħal ħitan waqqaf;

14mexxiehom bi sħaba binhar,

u b’ħuġġieġa ta’ dawl billejl.

15Xaqqaq il-blat fid-deżert,

sqiehom bħal b’baħar tal-ilma;

16ħareġ il-gliegel mill-blata,

ġerra bħax-xmajjar l-ilma.

17Iżda huma kontrih komplew dinbu,

qamu kontra Alla fid-deżert.

18Ġarrbu lill-Għoli f’qalbhom,

billi talbuh l-ikel li xtaqu.

19Tkellmu kontra Alla, u qalu:

“Jista’ Alla jħejji mejda fid-deżert?

20Hu ħabat il-blat, u l-ilma ħareġ,

widien tal-ilma gelglu;

ma jistax jagħti ħobż ukoll,

jew iħejji laħam għall-poplu tiegħu?”

21Għal dan il-kliem għadab il-Mulej;

tkebbes in-nar għal Ġakobb,

u s-saħna tiegħu xegħlet għal Iżrael.

22Għax huma ma emmnux lil Alla,

ma ttamawx fl-għajnuna tiegħu.

23Imma hu ordna s-sħab fl-għoli,

u fetaħ bwieb is-smewwiet;

24u xita ta’ manna bagħtilhom x’jieklu,

tahom il-qamħ mis-sema.

25Kull wieħed kiel il-ħobż tal-qalbenin,

ikel bix-xaba’ bagħtilhom.

26Tella’ r-riħ ilvant fis-smewwiet,

ħareġ ir-riħ isfel b’qawwietu.

27Xita ta’ laħam bħat-trab bagħtilhom,

għasafar bħar-ramel tal-baħar;

28u waqqagħhom f’nofs it-tined tagħhom,

madwar l-għerejjex fejn kienu jgħammru.

29Huma kielu u xebgħu għalkollox,

għax hu tahom kemm kienu xtaqu.

30Anqas laħqu temmew xewqithom,

kienu għadhom bl-ikel f’ħalqhom,

31xħin il-Mulej raġa’ inkorla għalihom;

qatlilhom l-aħjar nies tagħhom,

iż-żgħażagħ ta’ Iżrael mal-art xeħtilhom.

32B’danakollu baqgħu jidinbu,

ma emmnux fl-għeġubijiet tiegħu.

33U temm ħajjithom f’nifs wieħed,

is-snin tagħhom b’mewt għal għarrieda.

34Imbagħad kienu jfittxuh meta kien jeqridhom,

kienu jindmu u jfittxu ’l Alla bil-ħerqa;

35kienu jiftakru li Alla l-blata tagħhom,

Alla l-Għoli l-feddej tagħhom.

36Imma kienu jqarrqu bih bi kliemhom,

kienu jigdbulu bi lsienhom.

37Għax qalbhom ma kinitx sewwa miegħu,

ma kinux fidili mal-patt tiegħu.

38Iżda hu kien iħenn u jaħfrilhom il-ħtija,

ma kienx jasal biex jeqridhom;

ħafna drabi kien iżomm il-korla,

ma kienx jixgħel qilltu kollha.

39Kien jiftakar li bnedmin huma,

bħal żiffa li tgħaddi u ma terġax lura.

40Kemm-il darba qamu kontrih fid-deżert,

kemm-il darba nikktuh fl-art niexfa!

41Kienu jerġgħu jġarrbu lil Alla,

u jħeġġu l-korla tal-Qaddis ta’ Iżrael.

42Ma kinux jiftakru f’għemil idejh,

fil-jum li fdiehom mill-għadu,

43meta għamel il-mirakli fl-Eġittu,

l-għeġubijiet fir-raba’ ta’ Sogħan.

44Bidel f’demm ix-xmajjar tagħhom,

ma setgħux jixorbu min-nixxigħat tagħhom.

45Bagħtilhom dubbien li qeridhom,

u żrinġijiet li ħarbtuhom.

46Telaq għad-dud l-uċuħ tar-raba’,

u għall-ġradijiet ix-xogħol ta’ idejhom.

47Ħarbtilhom bis-silġ id-dwieli tagħhom,

u s-siġar tat-tin bil-ġlata.

48Qered bis-silġ il-bhejjem tagħhom,

u bis-sajjetti l-imrieħel tagħhom.

49Fetaħ għal fuqhom qawwet qilltu,

is-saħna, l-għadab u l-hemm.

Bagħtilhom l-anġli tal-ħsara,

50u witta t-triq għall-għadab tiegħu.

Ma ħafrilhomx il-mewt,

imma telaqhom għall-pesta.

51Qatel l-ulied il-kbar fl-Eġittu,

l-ewwel frott ta’ rġulithom fl-għerejjex ta’ Ħam.

52U ħareġ bħal nagħaġ il-poplu tiegħu,

bħal merħla fid-deżert mexxiehom.

53Qegħedhom fiż-żgur, u ma beżgħux;

imma l-għedewwa tagħhom għattiehom il-baħar.

54U daħħalhom fl-art imqaddsa tiegħu,

fuq l-għolja li kisbet il-leminija tiegħu.

55Keċċa l-ġnus minn quddiemhom,

u arthom qassam b’wirt lil Iżrael,

fi djarhom daħħal il-poplu tiegħu.

56Ġarrbu u kiddu lil Alla l-Għoli,

ma ħarsux il-kmandamenti tiegħu.

57Reġgħu lura u naqsu bħal missirijiethom,

għawġu triqthom bħal ark li jqarraq bik.

58Regħxuh fuq l-għoljiet tagħhom,

kebbsulu l-għira bl-idoli tagħhom.

59Sama’ b’dan Alla, u nxtegħel bl-għadab,

u warrab għalkollox lil Iżrael.

60Telaq is-santwarju ta’ Silo,

l-għarix fejn kien jgħammar fost il-bnedmin.

61Ħalla f’idejn l-għadu l-arka tiegħu,

fejn kien hemm il-qawwa u l-glorja tiegħu.

62Telaq għas-sejf il-poplu tiegħu,

ħadha bl-aħrax kontra wirtu.

63In-nar qered liż-żgħażagħ tagħhom,

siket l-għana taż-żwieġ għax-xbejbiet tagħhom.

64Il-qassisin tagħhom mis-sejf intlaqtu,

u ma setgħux jibkuhom ir-romol tagħhom.

65Qam imbagħad Sidi l-Mulej bħal minn raqda,

bħal gwerrier li jqum minn sakra.

66Laqat fuq wara l-għedewwa tiegħu,

tefagħhom fl-għajb għal dejjem.

67U warrab id-dar ta’ Ġużeppi,

ma għażilx it-tribù ta’ Efrajm;

68iżda għażel it-tribù ta’ Ġuda,

u l-għolja ta’ Sijon li kien iħobb.

69Hemm bena s-santwarju tiegħu bħall-ogħla smewwiet,

bnieh fis-sod bħall-art għal dejjem.

70Għażel lil David, qaddej tiegħu,

ħadu minn qalb l-imrieħel;

71minn wara n-nagħaġ bil-ħrief tagħhom ġiebu,

biex jirgħa ’l Ġakobb il-poplu tiegħu,

u lil Iżrael il-wirt tiegħu.

72Hu kien jirgħahom b’qalb safja,

bil-ħila ta’ idejh mexxiehom.