IL-KTIEB TAL-GĦERF 18 - Maltese Bible with DC

Kapitlu 18

1Imma għall-qaddisin tiegħek idda dawl kbir.

U dawk li semgħu leħenhom bla ma rawhom,

hienja sejħulhom, għax ma kinux qegħdin ibatu.

2Raddewlhom ħajr talli ma ħallsuhomx wara li ħaqruhom,

u talbuhom maħfra talli ħaduha kontrihom.

3Għal dan int tajt lill-qaddisin tiegħek kolonna tan-nar,

biex tmexxihom fi triq li ma kinux jafuha,

u xemx li ma kellhiex tagħmlilhom ħsara fil-mixja glorjuża tagħhom.

4L-oħrajn kien ħaqqhom jibqgħu bla dawl u jingħalqu ġo ħabs mudlam,

huma li żammew imjassra lil uliedek,

li minnhom kellu jingħata lid-dinja d-dawl tal-Liġi li ma jintemm qatt.Il-mewt tal-ulied il-kbar

5Huma riedu joqtlu t-trabi tal-qaddisin tiegħek;

imma wieħed mit-trabi tefgħuh barra, u ħeles mill-mewt.

Bi tpattija int ħadtilhom il-kotra ta’ wliedhom,

u għarraqthomlhom ilkoll f’salt wieħed f’baħar imqalleb.

6Dak il-lejl tħabbar minn qabel lil missirijietna,

biex, wara li għarfu sewwa f’liema wegħdiet emmnu,

aktar iqawwu qalbhom.

7Il-poplu tiegħek stenna l-ħelsien tal-ġusti,

u l-qerda tal-għedewwa tagħhom,

8għax kif int ikkastigajt l-għedewwa tagħna,

hekk sebbaħt lilna meta sejjaħtilna għalik.

9L-ulied twajba tal-ġusti offrew sagrifiċċju bil-moħbi,

u lkoll fehma waħda qagħdu għal-Liġi ta’ Alla,

li l-qaddisin tiegħek jaqsmu xorta bejniethom

kemm il-ġid u kemm id-deni;

għalhekk minn qabel għannew tifħir missirijiethom.

10Min-naħa tal-għedewwa kien jinstama’ għajjat li ma kienx jaqbel ma’ tagħhom,

u kien jidwi l-ilfiq huma u jibku lil uliedhom.

11L-istess kastig ħadu flimkien l-ilsir u sidu,

u l-poplu u s-sultan batew l-istess.

12Ilkoll flimkien b’mewta waħda,

kellhom mejtin bla għadd.

Il-ħajjin ma kinux biżżejjed biex jidfnu l-mejtin,

għax f’daqqa waħda nqerdu l-aħjar fost uliedhom.

13Għalkemm minħabba s-sħarijiet bl-ebda mod ma riedu jemmnu,

mal-mewt ta’ wliedhom il-kbar kellhom

jistqarru li l-poplu tiegħek kien bin Alla.

14Waqt li ħemda ta’ kwiet kienet taħkem fuq kollox,

u l-lejl kien jaqbeż nofs il-mixja tiegħu,

15il-kelma setgħana tiegħek mit-tron tas-sultan tas-sema,

niżlet bħal ġellied qalil, f’nofs dik l-art misħuta,

16bix-xabla misnuna tad-digriet tiegħek li dejjem sod.

Kif waslet, kullimkien imliet bl-imwiet;

kienet għadha tmiss mas-sema, hi u miexja fuq l-art.

17Imbagħad f’daqqa waħda werwruhom dehriet f’ħolm ikrah,

u biża’ li qatt ma basruh ġie fuqhom;

18u, mitfugħin nofshom mejta, min ’il hawn u min ’il hemm,

kienu jistqarru għaliex kienu qegħdin imutu,

19għax fil-ħolm li kien iħawwadhom dan għarfuh minn qabel,

biex ma jmutux bla ma jkunu jafu għala kienu jbatu.

Il-kastig ta’ Iżrael

20Fuq il-ġusti wkoll ġiet il-prova tal-mewt,

meta fid-deżert waqa’ kastig fuq il-ġemgħa,

iżda ma damitx wisq din il-korla ta’ Alla. malajr deher għalihom,

bil-mezzi f’idejh tal-ħidma tiegħu,

it-talb u l-inċens tat-tpattija.

Hu żamm il-korla tiegħek u waqqaf il-ħsara,

u hekk wera li hu qaddej tiegħek.

22Hu rebaħ il-ħruxija mhux bis-saħħa tal-ġisem

jew bil-qawwa tal-armi;

imma bi kliemu waqaf lil dak li kien isawwathom,

billi fakkru fil-pattijiet li ħalef lil missirijiethom.

23Meta l-iġsma waqgħu mejta gods wieħed fuq l-ieħor,

waqaf fin-nofs u rażżan il-korla ta’ Alla,

u għalqilha t-triq biex ma tilħaqx il-ħajjin.

24Id-dinja kollha kienet fuq il-libsa twila tiegħu,

ġieħ missirijietna kien minqux fuq ħaġar f’erba’ fillieri,

u l-kobor tiegħek kien fuq il-kuruna ta’ rasu.

25Quddiemhom il-qerriedi ċieda, għax beża’ minnhom,

kienet biżżejjed prova waħda biss tal-korla tiegħek.