1Uliedi, isimgħu minni, jien missierkom;
agħmlu kif ngħidilkom jien biex issalvaw.
2Għax il-Mulej għolla l-missier fuq it-tfal,
u saħħaħ dritt l-omm fuq l-ulied.
3Min jibża’ minn missieru jagħmel tajjeb għal dnubietu,
4u min iweġġaħ lil ommu qisu qed jiġma’ f’teżor.
5Min jibża’ minn missieru jifraħ b’uliedu, u meta jitlob jinstama’.
6Min iweġġaħ ’il missieru jkollu għomor twil,
u min iserraħ lil ommu jkun qed jisma’ mill-Mulej.
7Hu jaqdi l-ġenituri daqskieku sidienu.
8Bil-kliem u bl-għemil weġġaħ lil missierek,
ħa tinżel fuqek il-barka tiegħu;
9għax il-barka tal-missier issaħħaħ dar l-ulied,
imma s-saħta tal-omm taqlagħha mis-sisien.
10Titkabbarx b’għajb missierek,
għax għajb missierek mhuwiex ġieħ għalik;
11għax ftaħir il-bniedem hu l-ġieħ ta’ missieru,
u għajb l-ulied omm bla ġieħ.
12Ibni, ieqaf ma’ missierek fi xjuħitu,
u matul ħajtu tweġġagħlux qalbu.
13Ukoll jekk moħħu jeħfief, għadru,
u tonqsux mill-ġieħ meta għadek b’saħħtek,
14għax il-ħniena ma’ missierek ma tintesiex,
imma tingħaddlek bi ħlas għal dnubietek.
15F’jum l-għawġ tiegħek il-Mulej jiftakar fik,
u hekk jgħibu dnubietek bħal ġlata fix-xemx.
16Daqs midgħi min jitlaq lil missieru waħdu,
u misħut mill-Mulej min jgħaddab lil ommu.L-umiltà
17Ibni, kun ġwejjed fix-xogħol li tagħmel,
u tkun maħbub iktar minn wieħed milqugħ min-nies.
18Akbar m’int, iktar għandek iċċekken ruħek,
u ssib grazzja quddiem il-Mulej.
19Ħafna huma l-imkabbrin u l-imsebbħin,
imma l-Mulej jikxef lill-umli l-misteri tiegħu.
20Għax kbira hi s-setgħa tal-Mulej,
imma hu msebbaħ min-nies umli.
21Tfittixx dak li hu tqil wisq għalik,
dak li ma tiflaħx għalih, tistħarrġux.
22Ikun moħħok f’dak li tqabbadt tagħmel,
għax il-mistur xejn ma jiswielek.
23Tidħolx għal xogħol li mhuwiex tiegħek,
għax ukoll dak li tgħallimt jisboq moħħ il-bniedem.
24Għax ħafna marru żmerċ minħabba fil-ġudizzji li għamlu,
u żelqu fi ħsibijiethom minħabba fehma żbaljata.
25 Jekk m’għandekx għajnejn jonqsok id-dawl,
jekk m’għandekx l-għerf toqgħodx tiftaħar.
Il-kburija26Min hu qalbu iebsa fl-aħħar jispiċċa ħażin,
u min iħobb it-tiġrib jintilef fih.
27Min hu qalbu iebsa jitgħabba bl-inkwiet,
u l-midneb iżid dnub fuq dnub.
28M’hemmx duwa għall-bniedem kollu kburija,
għax din ħaxixa ħażina b’għeruqha mxenxla fih.
29Min għandu l-għerf jifhem il-proverbji
u l-għaref ħerqan li jkollu min jisimgħu.Il-karità mal-foqra
30L-ilma jitfi nar iħeġġeġ,
u l-karità tagħmel tajjeb għad-dnubiet.
31Min irodd bil-karità jaħseb għal quddiem,
u meta jaqa’ jsib fuqiex jistrieħ.
Who We AreWhat We EelieveWhat We Do
2025 by iamachristian.org,Inc All rights reserved.
