1Il-viżjoni ta’ Isaija bin Amos, li kellu dwar Ġuda u Ġerusalemm fi żmien Għużżija, Ġotam, Aħaż, Ħeżekija, slaten ta’ Ġuda.Ġens midneb
2Isimgħu, smewwiet!
Agħti widen, art!
Għax tkellem il-Mulej:
“Ulied rabbejt u kabbart,
u huma qamu kontrija.
3Il-gendus jagħraf lil sidu,
u l-ħmar il-maxtura ta’ sidu;
imma Iżrael ma jagħrafx,
il-poplu tiegħi ma jifhimx.”
4Jaħasra għalik,
ġens midneb,
poplu mgħobbi bil-ħażen,
nisel il-ħżiena,
ulied imħassrin!
Telqu lill-Mulej;
maqdru l-Qaddis ta’ Iżrael,
inġibdu lura minnu.
5Għaliex tridu tissawtu aktar?
Għaliex tibqgħu tirvillaw?
Ir-ras kollha marida,
il-qalb kollha mifnija.
6Minn qiegħ ir-riġel sar-ras,
xejn ma hemm sħiħ fih.
Xejn ħlief drib, tbenġil u ġrieħi jnixxu.
Ma naddfuhomx, anqas rabtuhom,
lanqas dewwewhom biż-żejt.
7Artkom imħarbta,
blietkom maħruqa bin-nar;
ir-raba’ tagħkom quddiemkom għad jikluh il-barranin;
kollox ħerba bħal Sodoma fit-tiġrif.
8Waħedha baqgħet bint Sijon,
bħal għarix f’qasam dwieli,
bħal girna f’għalqa bħajra,
bħal belt imdawra.
9Li kieku l-Mulej tal-eżerċti ma ħallilniex fdal żgħir,
bħal Sodoma konna nkunu,
lil Gomorra konna nixbhu.
Sejħa għall-konverżjoni10Isimgħu l-kelma tal-Mulej,
intom prinċpijiet ta’ Sodoma;
agħtu widen għat-tagħlim ta’ Alla tagħna,
intom nies ta’ Gomorra.
11X’tiswieli l-kotra tas-sagrifiċċji tagħkom?”,
jgħid il-Mulej.
Xbajt mis-sagrifiċċji tal-ħruq tal-bdabad,
u mix-xaħam tal-bhejjem smien.
Id-demm tal-gniedes u l-ħrief,
u tal-imtaten ma jogħġobnix.
12Meta tiġu taraw wiċċi
min ifittex dawn mingħandkom,
biex tiġu tikkalpestawli l-btieħi tiegħi?
13Iġġibux iżjed offerti fiergħa;
sirt nistkerrhu l-bħur,
il-qamar ġdid, is-sibt, u l-laqgħat li ssejħu:
ma niflaħx għall-ħażen flimkien mal-festi.
14L-ewwel tax-xhur u l-festi tagħkom, jien nobgħodhom,
piż huma għalija, għejejt nerfgħu.
15Meta intom tiftħu idejkom,
jien inwarrab għajnejja minnkom;
ukoll jekk tkattru t-talb,
jien ma nismagħkomx,
għax idejkom mimlija demm.
16Inħaslu u tnaddfu,
neħħu l-ħażen ta’ għemilkom minn quddiem għajnejja,
ieqfu mill-ħażen.
17Tgħallmu għamlu t-tajjeb,
fittxu d-dritt,
sewwu l-inġustizzji,
iddefendu l-iltim,
aqbżu għall-armla.
18Ejjew, mela, nirraġunaw flimkien,
jgħid il-Mulej,
imqar jekk dnubietkom ikunu ħomor bħall-iskarlatt,
isiru bojod bħas-silġ;
imqar jekk ikunu ħomor bħall-kremżi,
isiru bojod bħas-suf.
19Jekk intom tridu u tobdu,
intom tieklu l-ġid tal-art.
20Iżda jekk tgħidu le u twebbsu raskom,
ix-xabla tikolkom,
għax fomm il-Mulej tkellem.”Il-ġudizzju u l-fidwa ta’ Sijon
21Kif saret żienja l-belt fidila!
Kienet mimlija bil-ġustizzja,
kien jgħammar fiha s-sewwa,
imma issa l-qattiela.
22Il-fidda tiegħek inbidlet f’karfa,
l-inbid tiegħek mifqugħ bl-ilma.
23Il-prinċpijiet tiegħek qamu fuq tagħhom,
u ssieħbu mal-ħallelin.
Ilkoll iħobbu r-rigali,
u jagħmlu għal wara l-qligħ.
L-iltim ma jagħmlulux ġustizzja,
u l-kawża tal-armla għandhom ma tasalx.
24Għalhekk dan hu l-oraklu ta’ Sidna,
il-Mulej tal-eżerċti,
il-Qawwi ta’ Iżrael:
“Ah! Nivvendika ruħi mill-għedewwa tiegħi;
nitħallas mill-għedewwa tiegħi.
25Inmidd idejja għal fuqek,
u nsaffik fil-forġa minn ħmieġek,
u ċ-ċomb kollu nneħħilek.
26U rraġġa’ l-imħallfin tiegħek għal li kienu dari,
u l-kunsillieri tiegħek għal li kienu fil-bidu.
Imbagħad isejħulek:
‘Belt is-Sewwa,
il-Belt Fidila’.”
27Bil-ġustizzja Sijon għad tinfeda;
u dawk li jikkonvertu jinfdew bis-sewwa.
28Imma l-midinbin u l-ħatjin flimkien jitkissru;
u dawk li jitilqu l-Mulej jintemmu.
29Għax intom għad tistħu mill-ballut li ħabbejtu;
u għad titriegħxu minħabba l-ġonna li għażiltu.
30Għad tkunu bħal balluta bil-weraq midbiel;
bħal ġnien bla ilma fih.
31U l-bniedem b’saħħtu jsir stoppa,
u għemilu xrar,
u jieħdu n-nar flimkien,
bla ma ħadd jitfihom.
Who We AreWhat We EelieveWhat We Do
2025 by iamachristian.org,Inc All rights reserved.
