EŻEKJEL 31 - Maltese Bible with DC

Kapitlu 31L-allegorija taċ-ċedru tal-Libanu

1Ġara li fis-sena ħdax, fl-ewwel tat-tielet xahar, ġietni l-kelma tal-Mulej, u qalli:

2O bniedem, għid lill-Fargħun, is-sultan tal-Eġittu, u l-kotra ta’ niesu: Lil min tixbah int bi kburitek?

3“Ara, l-Assirja, bħaċ-ċedru tal-Libanu,

bil-friegħi sbieħ, u b’dell mifrux,

wieqaf fil-għoli

u sa bejn is-sħab

tlaħħaq il-quċċata tiegħu.

4L-ilma kabbru,

u rawmuh l-ilmijiet tal-qiegħ,

li ġrew fl-imġieri tagħhom fejn kien miżrugħ,

u medd is-swieqi tiegħu

lejn is-siġar kollha tar-raba’.

5Għalhekk kiber u għola

’l fuq minn kull siġra tar-raba’,

u kotru r-rimjiet tiegħu,

u nfirxu l-friegħi tiegħu,

minħabba l-gliegel tal-ilma,

meta kien qed jikber.

6Fi frigħetu bejtu

t-tjur kollha tal-ajru,

u taħt il-friegħi tiegħu

wildu l-bhejjem tar-raba’,

u taħt dellu għammret

kotra ta’ nies minn kull ġens.

7Kiber u sbieħ

fil-medda tal-friegħi tiegħu,

għax kienu għeruqu

mxenxla fl-ilma kotran.

8Ma kien hemm ebda ċedru bħalu

fi ġnien Alla;

ebda ċipress ma kien ilaħħaq

miegħu fi frigħetu;

ebda siġra tal-platanu

ma kienet daqsu fi frigħetha;

ebda siġra fi ġnien Alla

ma kienet tlaħħaq miegħu fi ġmielha.

9Jien sebbaħtu bil-kotra ta’ frigħetu,

u għeru għalih is-siġar kollha tal-Għeden,

li kienu fi ġnien Alla.Il-waqgħa tal-Eġittu

10“Għalhekk dan jgħid Sidi l-Mulej:

‘Talli għola f’tulu, u rafa’ rasu sa ġos-sħab,

u talli qalbu tkabbret bl-għoli tiegħu,

11jiena rħejtu f’idejn l-aqwa fost il-ġnus ħalli jagħmillu skont ħżunitu.

12Qaċċtuh il-barranin, popli mill-eħrex fost il-ġnus,

u waddbuh fuq l-għoljiet, u frigħetu twaqqgħu mal-widien kollha,

u ż-żraġen tiegħu tkissru fil-ħniedaq kollha tal-art,

u ħarbu l-ġnus kollha minn taħt dellu u telquh.

13Fuq il-ħerba tiegħu tistrieħ

kull tajra tal-ajru,

fuq frigħetu toqgħod

kull bhima tar-raba’,

14biex ma tikber ebda siġra ħdejn l-ilma,

u togħla u terfa’ rasha fis-sħab,

u ebda xitla ħdejn l-ilma ma togħla daqshom,

għaliex kollha mitluqin għall-mewt għal taħt l-art,

f’nofs il-bnedmin, fost dawk li jinżlu fil-ħofra.”

15Dan jgħid Sidi l-Mulej:

“Fil-jum li fih niżel Art l-Imwiet, ġagħalt l-Abbiss jitbekka għalih; żammejt ix-xmajjar tiegħu u ntemmu l-gliegel tal-ilma; minħabba fih libbistu bil-vistu l-Libanu u dbielu s-siġar kollha tar-raba’ minħabba fih.Num 16,33.

16Triegħxu l-ġnus mal-waqgħa tiegħu, meta niżżiltu Art l-Imwiet, ma’ dawk li niżlu fil-qabar. Tfarrġu fid-dinja ta’ taħt is-siġar kollha tal-Għeden, l-aħjar u l-isbaħ siġar tal-Libanu, imsoqqija bl-ilma.Is 14,15; Eżek 32,18-31.

17U wkoll dawk li kellu miegħu niżlu Art l-Imwiet fost il-maqtulin bix-xabla; u dawk li kienu jgħinuh u jgħammru taħt dellu f’nofs il-ġnus jinqerdu miegħu.

18“Lil min tixbah fi ġmielek u l-kobor tiegħek fost is-siġar tal-Għeden? Imma int titniżżel f’qiegħ l-art mas-siġar tal-Għeden, u f’nofs in-nies bla ħtin timtedd flimkien mal-meqrudin bix-xabla.

“Dan hu l-Fargħun u l-kotra ta’ niesu.” Oraklu ta’ Sidi l-Mulej.