EŻEKJEL 28 - Maltese Bible with DC

Kapitlu 28Is-suppervja ta’ Tir u l-qerda tagħha

1U ġietni l-kelma tal-Mulej u qalli:

2“O bniedem, għid lill-prinċep ta’ Tir:

Dan jgħid Sidi l-Mulej:

Int tkabbart f’qalbek u għedt:

‘Jien alla!

Jien qiegħed fuq tron l-allat,

f’nofs l-ibħra,’

meta m’intix ħlief bniedem, u mhux alla;

u ħsibt li għerfek hu għerf l-allat.

3Arak! int egħref minn Danjel,

ebda moħba mhi mistura għalik:

4b’għerfek u b’dehnek int stagħnejt,

ħżint deheb u fidda fit-teżori tiegħek.

5Bl-għerf kbir tiegħek u bil-kummerċ tiegħek

kattart ġidek,

u qalbek tkabbret b’dan il-ġid.

6Għalhekk dan jgħid Sidi l-Mulej:

Talli ħsibt li għerfek hu għerf l-allat,

7arani, se nġib fuqek il-barranin,

l-aktar nies ħorox fost il-popli,

jisiltu x-xwabel tagħhom

kontra ġmiel għerfek,

u jżebilħulek sebħek.

8Iniżżluk fil-ħofra,

u tmut il-mewta iebsa

tal-midrubin f’nofs ta’ baħar.

9Tibqa’ tgħid imbagħad: ‘Jien alla,’

quddiem il-qattiela tiegħek,

meta m’intix ħlief bniedem, u mhux alla,

f’idejn dawk li jidorbuk?

10Int tmut il-mewt ta’ nies bla ħtin,

f’idejn il-barranin

Għax jien tkellimt.”

Oraklu ta’ Sidi l-Mulej.

Il-prinċep ta’ Tir

11U ġietni l-kelma tal-Mulej, u qalli:

12“O bniedem, għanni lamentazzjoni għas-sultan ta’ Tir u għidlu:

‘Dan jgħid Sidi l-Mulej:

Int mibni kollok perfett,

mimli għerf u kollok ġmiel.

13Fl-Għeden, il-ġnien ta’ Alla,

kont imdawwar b’kull xorta ta’ ħaġar prezzjuż,

sardju, topazju, djamant, krisoltu,

oniċi, djaspru, żaffir, rubin, żmerald.

Tad-deheb kienu l-ġlieġel tiegħek,

u l-ġawhar li kellek fuqek,

f’jum ħolqienek għamluhomlok.

14Lilek mal-kerubin bi ġwenħajh miftuħa,

jien għamiltek għassies.

Int kont fuq il-muntanja mqaddsa ta’ Alla,

u kont timxi f’nofs il-ħaġar tan-nar.

15Bla ħtija kont f’mixjietek sa minn ħolqienek,

sakemm ma nkixifx qerqek.

16Bil-kobor tan-negozju tiegħek

imtlejt bl-inġustizzja u dnibt,

u jien warrabtek mill-muntanja ta’ Alla,

u l-kerubin għassies ħarġek

minn qalb il-ġamar tan-nar.

17Qalbek tkabbret bi ġmielek;

ħassart għerfek bi tlellixek.

Jien sabbattek mal-art,

minħabba d-delitti tiegħek,

perriċtek quddiem is-slaten

biex jitpaxxew bik.

18Bil-kotra tal-ħażen tiegħek,

bil-qerq tan-negozju tiegħek,

int żeblaħt is-santwarji tiegħek.

Għalhekk jien ħriġt nar minn ġo nofsok,

u belgħek u għamlek irmied fuq l-art,

quddiem in-nies iħarsu lejk.

19Kull min kien jafek minn fost il-popli

baqa’ skantat bik:

int sirt waħx, u ma terġa’ tqum qatt iżjed.”

Oraklu kontra Sidon

20Ġietni l-kelma tal-Mulej u qalli:

21“O bniedem, dawwar wiċċek lejn

Sidon u ħabbrilha

23Nibagħtilha fiha l-pesta;

u d-demm jiġri fi triqatha;

il-midrubin jaqgħu f’nofsha,

bix-xabla li taqa’ fuqha minn kull naħa

u jkunu jafu li jien il-Mulej.”

Ir-restawrazzjoni ta’ Iżrael

24Ma jkunx hemm aktar għal Iżrael, la xewk li jniggeż u anqas għollieq li jwaġġa’, minn fost il-ġirien li kienu jobogħduhom, u jkunu jafu li jien is-Sid, il-Mulej.”

25Dan jgħid Sidi l-Mulej: “Meta niġbor id-dar ta’ Iżrael minn qalb il-popli li fosthom xerridthom, jien nuri qdusiti fihom taħt għajnejn il-ġnus, u jgħammru fl-art li jien tajt lill-qaddej tiegħi Ġakobb.

26U jgħammru fiha b’moħħhom mistrieħ u jibnu d-djar, ixettlu d-dwieli, u jgħammru b’moħħhom mistrieħ meta nkun għamilt ħaqq minn għedewwiethom ta’ madwarhom li kienu jistmerruhom u jkunu jaf li jien il-Mulej Alla tagħhom.”