NEĦEMIJA 6 - Maltese Bible with DC

Kapitlu 6It-tnassis kontra Neħemija

1Mela jisimgħu Sanballat, Tobija, Gesem, l-Għarbi, u l-bqija tal-għedewwa tagħna, li kont bnejt is-swar u ma kienx fadal tiċrit fihom, għalkemm kont għadni ma qegħedtx il-bibien fid-daħliet.

2U bagħtu jgħiduli Sanballat u Gesem: “Ejja niltaqgħu flimkien f’Kefirim, fil-wita ta’ Onu.” Il-ħsieb tagħhom kien li jagħmluli d-deni.

3Jien għalhekk bgħatt messaġġiera jgħidulhom: “Għandi biċċa xogħol ġmielha x’nagħmel; għalhekk ma nistax ninżel niltaqa’ magħkom għax għandi nitlaq kollox u jieqaf ix-xogħol biex ninżel għandkom?”

4Imma huma bagħtu jgħiduli l-istess ħaġa erba’ darbiet u jien dejjem bgħattilhom l-istess tweġiba.

5U għall-ħames darba Sanballat bagħat għandi, bħal qabel, il-qaddej tiegħu. Dan kellu f’idu ittra miftuħa,

6li fiha kien hemm miktub hekk: “Qegħdin jingħadu xi xnigħat fost il-ġnus. Gesem qiegħed jgħid li int u l-Lhud għandkom il-ħsieb li tirvellaw, u għalhekk qegħdin tibnu s-swar. Skont ma qiegħed jingħad, int trid tkun is-sultan tagħhom,

7u wasalt biex qegħedt profeti li jħabbru fuqek f’Ġerusalemm u jgħidu: ‘Għandna sultan f’Ġuda!’ Issa s-sultan jisma’ b’dan kollu. Ejja għalhekk ħa nitħaddtu bejnietna.”

8Imma jien bgħatt ngħidlu: “Dak li qed tgħid mhuwiex minnu! Qlajtu int minn żniedek!”

9Għax kollha kemm huma riedu jbeżżgħuna meta qalu: “Idejhom ma jkunux jifilħu għal dan ix-xogħol, u ma jispiċċawhx.” Imma jien issa aktar għamilt il-qalb.

10Jien imbagħad mort id-dar ta’ Semajja bin Delaja, bin Meħetabel, fejn kien joqgħod magħluq. U hu qalli: “Ejja niltaqgħu fid-dar ta’ Alla, fil-qalba tat-tempju, u nagħlqu warajna l-bibien tat-tempju, għax ġejjin joqtluk. Ġejjin joqtluk billejl.”

11Imma jien weġibtu: “U raġel bħali se jaħrab? Jew min hu bħali jista’ jidħol fit-tempju u jibqa’ ħaj? Le, ma mmurx!”

12Għax, ara, jien fhimt li ma kienx mibgħut minn Alla, imma kien kellimni bħallikieku kien imnebbaħ, għax Tobija u Sanballat kienu xtrawh.

13Hu kien ġie mħallas biex ibeżżagħni, ħa nagħmel dak li qalli, u nidneb; u hekk ikolli isem ħażin magħhom, u jkollhom fuqiex iċanfruni.

14Ftakar, Alla tiegħi, f’Tobija u f’Sanballat minħabba f’dak li għamlu. Ftakar ukoll f’Nogħadija, il-profetissa, u fil-bqija tal-profeti, li kienu qegħdin ibeżżgħuni.

15Is-swar tlestew fil-ħamsa u għoxrin tax-xahar ta’ Elul, fi żmien tnejn u ħamsin ġurnata.

16U meta semgħu b’dan l-għedewwa tagħna kollha u rawh il-ġnus li kienu joqogħdu madwarna, intebħu li kienu waqgħu fl-istima tagħhom stess; u saru jafu li dan ix-xogħol kien sar bl-għajnuna ta’ Alla tagħna.

17Saħansitra f’dawk il-jiem il-kbarat ta’ Ġuda bagħtu ħafna ittri lil Tobija, u Tobija bagħtilhom ħafna wkoll.

18Ħafna f’Ġuda kienu konfoffa waħda miegħu billi hu kien jiġi r-raġel ta’ bint Sekanija bin Araħ, u ibnu Ġeħoħanan kien iżżewweġ lil bint Mesullam bin Berekija.

19Kienu saħansitra jitkellmu quddiemi fuq it-tajjeb tiegħu, u kliemi kienu jwassluhulu. U Tobija kien jibgħat ittri biex ibeżżagħni.