HOSEGĦA 12 - Maltese Bible with DC

Kapitlu 12L-infedeltà ta’ Iżrael

1Dawwarni bil-gideb Efrajm,

u bil-qerq id-dar ta’ Iżrael;

u Ġuda għadu jtalla’ u jniżżel dwar Alla,

Alla l-Qaddis u l-fidil.

2Efrajm jirgħa r-riħ,

u jiġri wara x-Xlokk kuljum;

u jżid fil-gideb u l-qerq.

Jagħmel patt mal-Assirja

u lejn l-Eġittu jġorr iż-żejt.

3Il-Mulej għandu xi jgħid ma’ Iżrael

u jikkastiga lil Ġakobb għal imġibtu,

u jroddlu skont għemilu.

4F’ġuf ommu qabad għarqub ħuh,

u fl-aqwa tiegħu ssara ma’ Alla.

5Issara mal-anġlu u għelbu,

beka u talbu l-ħniena,

F’Betel sab lil Alla;

u hemm Alla tkellem miegħu,

6il-Mulej, Alla tal-eżerċti,

Jaħweh ismu:

7“Bil-għajnuna ta’ Alla tiegħek,

int terġa’ lura fl-għerejjex tiegħek:

ħares it-tjieba u l-ġustizzja,

u ttama dejjem f’Alla tiegħek.”

8Kangħan għandu f’idu miżien ħażin,

u jħobb iqarraq.

9U Efrajm qal: “Isma’, jien stagħnejt,

ksibt il-ġid għalija!”

Imma milli daħħal xejn ma jibqagħlu,

minħabba l-ħażen li għamel.

10Jiena l-Mulej Alla tiegħek

sa mill-art tal-Eġittu.

Nerġa’ nqiegħdek tgħammar taħt it-tined

bħal fil-jiem tal-laqgħa.

11U kellimt lill-profeti

u kattart id-dehriet;

u permezz tal-profeti

nitkellem bil-parabboli.

12Jekk f’Gilgħad hemm il-ħażen,

żgur għad jiġu fix-xejn.

F’Gilgal imbagħad offrew il-gniedes.

L-artali tagħhom isiru gzuz tal-ġebel

fir-raddi tar-raba’.

13U Ġakobb ħarab lejn ir-raba’ ta’ Aram,

u Iżrael ħadem għal mara,

u għal mara għamilha ta’ għassies.

14U permezz ta’ profeta talla’ l-Mulej

lil Iżrael mill-Eġittu,

u permezz ta’ profeta kien imħares.

15Imma Efrajm lill-Mulej inkorla sewwa,

għalhekk demmu jitwaddab fuqu,

u Sidu jroddlu l-għajb tiegħu.