ŻAKKARIJA 9 - Maltese Bible with DC

Kapitlu 9L-art il-ġdida

1Oraklu:

Il-Mulej għadda mill-art ta’ Ħadrak,

u Damasku l-post tal-mistrieħ tiegħu;

għax tal-Mulej huma bliet Aram,

u kull tribù ta’ Iżrael.

2U Ħamat ukoll, li tmiss miegħu,

u Tir u Sidon, għad li għerfhom kbir.

3Għaliha nfisha Tir bniet fortizza,

u ġabret fidda bħat-trab,

u deheb bħat-tajn tat-triqat.

4Ara, is-Sid għad jagħmilha priża

u ġidha jwaddabhulha fil-baħar,

5Askalon tara dan u tibża’,

titkexkex Gaża, u Għekron ukoll,

għax it-tama tagħha tisfa fix-xejn.

Is-sultan jgħib minn Gaża,

Askalon ma tkunx mgħammra bin-nies,

6u nies ta’ demm imħallat jgħammru f’Asdod!

U jiena neqred il-kburija tal-Filistin,

7demmhom inneħħilhom minn fommhom,

u t-tinġis tagħhom minn bejn snienhom;

isiru huma wkoll fdal lil Alla tagħna,

u jkunu bħal familja f’Ġuda,

u Għekron bħall-Ġebusin.

8U noqgħod għassa madwar Dari,

biex ħadd ma joqgħod dieħel u ħiereġ,

u ma jidħolx aktar għalihom min jaħqarhom,

għax issa rajt l-hemm tagħhom.

Il-Messija

9Ifraħ kemm tiflaħ, bint Sijon;

għajjat bil-ferħ, bint Ġerusalemm!

Ara, is-sultan tiegħek ġej għandek;

ġust u rebbieħ,

umli u riekeb fuq ħmar,

fuq felu ta’ ħmara.

10Hu jeqred il-karru minn Efrajm

u ż-żiemel minn Ġerusalemm;

jinqered il-qaws tal-gwerra.

Hu jxandar il-paċi lill-ġnus,

il-ħakma tiegħu tkun minn baħar sa baħar,

u mix-xmara tal-Ewfrat sat-trufijiet.It-tiġdid ta’ Iżrael

11Int ukoll, minħabba d-demm tal-patt tiegħek li għamilt miegħi,

nitlaqlek l-ilsiera tiegħek

ħielsa mill-ħofra fejn ma hemmx ilma.

12U jerġgħu lura għandek, bint Sijon,

l-ilsiera li qegħdin bit-tama.

Mil-lum stess inħabbar

li għad irroddlok id-doppju.

13Għax il-qaws tiegħi, li hu Ġuda, hu miġbud,

armajtu bil-vleġġa, li hi Efrajm.

Se nvenven ’l uliedek bħal lanza, Sijon,

kontra wliedek, Ġawan,

u nagħmlek bħal sejf ta’ gwerrier.

14Imbagħad il-Mulej jidher fuqhom,

u toħroġ bħal berqa l-vleġġa tiegħu.

Il-Mulej Sidi jdoqq it-tromba,

u jimxi ’l quddiem fit-tempesti tan-Nofsinhar.

15Il-Mulej tal-eżerċti jħarishom,

u jaslu li xejn ma jqisu ċ-ċagħak tal-iżbandoli;

ixejnuhom u jisħquhom taħt riġlejhom.

Id-demm jixorbuh qisu nbid,

u jimtlew bih bħall-kantunieri tal-artal.

16Dakinhar isalvahom il-Mulej, Alla tagħhom,

jirgħa l-poplu tiegħu bħal merħla,

għax bħal ġawhar prezzjuż ta’ dijadema

jkunu jleqqu fuq l-art tiegħu.

17Xi tjubija u xi ġmiel ikun fiha!

Il-qamħ jaħji ż-żgħażagħ,

u l-inbid ġdid it-tfajliet.