PROVERBJI 19 - Maltese Bible with DC

1Aħjar fqir li jgħix bla ħtija,

minn wieħed għani li jqarraq bi kliemu.

2Mhix tajba l-ħeġġa mingħajr il-ħsieb;

u min jimxi bl-għaġla jitlef triqtu.

3Bi bluhatu l-bniedem jgħarraq ħajtu,

u mbagħad jeħodha kontra l-Mulej.

4L-għana jiġbed ħafna ħbieb,

imma l-fqir sa ħabibu jitilqu.

5Min jixhed il-falz ma jibqax bla kastig,

u min ilissen il-gideb ma jeħlishiex.

6Ħafna jfittxu jinħabbu ma’ min hu jdejh miftuħa,

kulħadd ħabib ta’ min iħobb jagħti.

7Lill-fqir sa ħutu jaħarbuh;

kemm aktar ħbiebu jitbiegħdu minnu!

Ifittixhom bi kliemu, imma kollu għalxejn.

8Min jikseb id-dehen iħobb lilu nnifsu,

min jgħożż l-għaqal ikollu r-riżq.

9Min jixhed il-falz ma jibqax bla kastig,

u min ilissen il-gideb jintilef.

10Ma jixraqlux lill-iblah il-lussu;

kemm anqas lill-ilsir li jaħkem fuq il-kbarat!

11Bniedem bil-għaqal idum ma jagħdab,

hu ġieħ għalih jagħlaq għajnejh għall-offiża.

12L-għadab ta’ sultan bħal għajta ta’ ljun,

imma ħnientu bħal nida fuq il-ħaxix.

13Iben iblah hu l-għali ta’ missieru,

u mara ġellieda bħall-ilma jqattar dejjem.

14Id-dar u l-għana wirt il-missirijiet,

imma mara bil-għaqal hi don tal-Mulej.

15L-għażż iġib in-ngħas,

u l-għażżien ibati l-ġuħ.

16Min iħares il-liġi jħares lilu nnifsu;

min imaqdar il-kelma ta’ Alla jmut.

17Min iħenn għall-fqir ikun qed jislef lill-Mulej,

u hu jroddhulu bi ħlas tajjeb.

18Widdeb ’l ibnek dment li hemm tama għalih;

imma tkunx daqshekk aħrax li twasslu għall-mewt.

19Min jagħdab iżżejjed ibati hu;

u jekk teħilsu mill-kastig, jagħmel agħar.

20Isma’ l-parir u ilqa’ t-tagħlim,

biex ikollok l-għerf sal-aħħar ta’ ħajtek.

21Wieħed jista’ jfassal ħafna ħsibijiet,

imma dak li jseħħ hu l-ħsieb tal-Mulej.

22Il-bniedem jiġbdek bi tjubitu;

aħjar tkun fqir milli giddieb.

23Il-biża’ tal-Mulej iwassal għall-ħajja;

min jimtela bih ma jilħqux id-deni.

24L-għażżien idaħħal idu fil-platt,

u mank ireġġagħha lura lejn ħalqu.

25Jekk issawwat il-vjolenti, jitgħallem iċ-ċkejken,

widdeb l-għaqli, u hu jifhmek u jitgħallem.

26Min jgħakkes lil missieru u jkeċċi ’l barra ’l ommu,

hu iben bla ġieħ u kollu għajb.

27Tisma’ xejn it-tagħlim, ibni,

la trid titwarrab minn kliem l-għerf.

28Xhud ħażin jidħak bil-ġustizzja,

u fomm il-ħżiena jibla’ l-qerq.

29Għall-vjolenti hemm il-kundanna,

u s-swat għal dahar il-boloh.