ĦABAKKUK 1 - Maltese Bible with DC

Kapitlu 1

1L-Oraklu li kellu f’dehra l-profeta ĦabakkukIl-qerda tal-ġustizzja

2Mulej, kemm se ndum nokrob

għall-għajnuna u int ma tismax!

Jew ngħajjat: “Vjolenza!”

u int ma ssalvax!

3Għaliex turini l-ħażen,

u inti toqgħod tħares lejn il-ħtija?

Quddiemi qerda u vjolenza,

hemm it-tilwim, u l-ġlied dejjem jiżdied.

4U b’hekk il-liġi sfat mingħajr saħħa,

qatt iżjed ma jsir ħaqq.

Għax il-ħażin idur madwar il-ġust,

għalhekk il-ħaqq li jsir ikun mgħawweġ.Il-Kaldin bħala kastig ta’ Alla

5Itfgħu ħarstkom fuq il-ġnus, araw,

stagħġbu, tbikkmu bl-għaġeb:

għaliex fi żmienkom stess għad issir ħaġa

li, jekk tingħad, ma temmnuhiex.

6Għax, ara, jiena nqajjem il-Kaldin,

il-ġens qalil li jaħbat għal kulħadd,

u jaqsam l-art fil-wisa’ kollu tagħha,

jaħtaf imkejjen mgħammra mhumiex tiegħu.

7Hu ġens li jwerwer, ta’ min jibża’ minnu;

il-ħaqq u l-qerda skont kif jidhirlu hu.

8Iż-żwiemel tiegħu eħfef mil-ljupardi,

eħrex mil-lpup ta’ filgħaxija.

Ilebbtu r-rikkieba tiegħu,

ġejjin mill-bogħod ir-rikkieba tiegħu,

itiru b’ħeffa t’ajkla tfittex l-ikel.

9Ilkoll kemm huma ġejjin għall-vjolenza,

il-biża’ ta’ dehrithom jasal qabilhom;

il-priġunieri jiġimgħuhom daqs ir-ramel.

10Dal-ġens iwaqqa’ s-slaten għaż-żufjett,

jidħak bil-prinċpijiet,

jiddieħak b’kull fortizza,

u jtalla’ gzuz ta’ terrapien u lilha jieħu!

11Imbagħad jonfoħ bħar-riħ

u jibqa’ għaddej,

dal-ħati li qawwietu alla tiegħu!Il-ħruxija tal-għedewwa

12Jaqaw m’intix minn dejjem int, Mulej?

M’intix Alla l-Qaddis tiegħi, li ma tmutx?

Mulej, dan minnek sar, biex tagħmel ħaqq,

u sħiħ daqs blata ridtu jkun, b’kastig!

13Int għajnejk safja wisq biex tara l-ħażen,

inti ma tiflaħx tħares lejn id-deni;

l-għala nies mill-agħar tħobb tagħti kashom,

iżżomm is-skiet meta min hu ħażin

jibla’ lil min hu aktar minnu ġust?

14Int tagħmel il-bnedmin bħall-ħut tal-baħar,

bħall-bhejjem ta’ fuq l-art, bla sid għalihom.

15Huwa jtellagħhom kollha bis-sunnara,

u, wara li jressaqhom bix-xbiek tiegħu,

jiġborhom kollha bil-konz tiegħu:

u b’hekk jithenna u jifraħ.

16Għalhekk lix-xbiek joffrilu sagrifiċċju,

jaħraq l-inċens quddiem il-konz tiegħu;

għax bihom sehmu joktor

u iklu jkun aktar utiq.

17Se jibqa’ jferragħ ix-xibka tiegħu

u joqtol il-ġnus bla waqfien?