HOSEGĦA 4 - Maltese Bible with DC

Kapitlu 4Id-dnubiet ta’ Iżrael

1Isimgħu l-kelma tal-Mulej,

ulied Iżrael.

Għax il-Mulej għandu kawża

man-nies tal-pajjiż.

Għax m’hemmx fedeltà u lanqas tjieba;

m’hemmx għarfien ta’ Alla fl-art;

2ħalf u gideb, qtil u serq;

u kotra ta’ adulterji,

vjolenza fil-pajjiż, u delitt fuq ieħor.

3Għalhekk il-pajjiż għad jibki,

u jinfena kull min jgħammar fih;

il-bhejjem tax-xagħri,

u t-tajr tal-ajru,

u mqar il-ħut ukoll jinqered.

4Madankollu ħadd m’għandu jitlewwem,

ħadd m’għandu jipprotesta:

il-ġlieda tiegħi miegħek, qassis.

5Int togħtor binhar,

u jogħtor miegħek billejl

il-profeta wkoll,

u jien neqridlek ’l ommok.

6Jinqered il-poplu tiegħi

minħabba n-nuqqas ta’ għarfien.

U billi inti warrabt l-għarfien,

inwarrbek jien milli tkun qassis għalija.

Talli int insejt il-liġi ta’ Alla tiegħek,

jien wkoll ninsa lil uliedek.

7Aktar ma kotru,

aktar dinbu kontrija.

Imma jien inbiddel il-glorja tagħhom f’għajb.

8Jieklu minn fuq dnub il-poplu tiegħi,

imxennqa għal ħżunithom.

9Poplu u qassis l-istess jiġrilhom.

Jien nikkastiga mġibtu,

u għemilu rreġġa’ għal fuqu.

10Għad jieklu, u ma jixbgħux,

jiżnu u ma joktrux.

Għax warrbu lill-Mulej,

biex marru jgħożżu ż-żina.

11L-inbid ġdid u l-qadim itellfu l-għaqal.

12Il-poplu tiegħi jmur jistħarreġ l-għuda tiegħu,

u l-ħatar tiegħu iħabbarlu;

għax l-ispirtu taż-żina tellifhom it-triq,

u żnew u tbiegħdu minn Alla tagħhom.

13Joffru s-sagrifiċċji fuq il-qċaċet tal-muntanji,

u jaħarqu l-inċens fuq l-għoljiet,

taħt il-ballut, il-luq u t-terebint,

għax dellhom tajjeb.

Għalhekk bnietkom jiżnu,

u n-nisa ta’ wliedkom adulteri.L-adulterji ta’ Iżrael

14Ma nikkastigax ’il bnietkom għax jiżnu, lanqas in-nisa ta’ wliedkom għax adulteri. Għax l-irġiel stess iwarrbu man-nisa żienja, u joffru s-sagrifiċċju man-nisa tas-santwarji, u hekk jintemm poplu bla għaqal.

15Jekk żienja int, Iżrael,

tħallix ’il Ġuda jaqa’ fil-ħtija.

La tmorrux Gilgal

u la titilgħux Bet-awen,

u la taħilfux: “Daqs kemm hu ħaj il-Mulej.”

16Bħal għoġla rasha iebsa,

webbset rasha Iżrael:

Jista’ issa jirgħahom il-Mulej,

bħallikieku ħrief fil-mergħat wiesgħa?

17Efrajm issieħeb mal-allat,

erħilu waħdu.

18Legilgu kemm felħu,

u żnew kemm riedu.

Ħabbew l-għajb aktar minn ġieħhom.

19Riefnu għad jaħtafhom taħt ġwinħajh,

u huma għad jistħu mill-artali tagħhom.