KOĦÈLET 10 - Maltese Bible with DC

Kapitlu 10L-għerf u l-bluha

1Bħalma d-dubbien mejjet initten il-fwieħa fil-vażett, hekk il-fama kbira tal-għaref tgħarraqha ftit tal-bluha.

9Jekk tqanqal il-ġebel tista’ titħaxxem bih,

jekk tqatta’ l-ħatab tindarab bil-laqx.

10Jekk tixxellef il-lexxuna u ma ssinnhiex,

trid tisforza aktar biex taqta’ biha;

jiswa, mela, li żżomm għaqlek jaħdem.

11Jekk is-serp jigdem qabel ma jkun imsaħħar,

xejn ma jiswielu ’l min jaf isaħħru.

12L-għaref kliem fommu jiksiblu ġieħ,

imma l-iblah ilsienu stess jeqirdu;

13il-bidu ta’ kliemu bluha,

u t-tmiem tiegħu ġenn mill-ikreh.

14Imma l-iblah xorta jibqa’ jkattar kliemu.

Il-bniedem ma jafx x’għad ikun,

u xi jsir wara mewtu min jista’ jgħidlu?

15Jifnih lill-iblah it-taħbit tiegħu,

għax lanqas sal-belt ma jaf imur.

16Jaħasra għalik, o art, li s-sultan tiegħek tifel,

u l-kbarat tiegħek jisbħu jieklu.

17Ixxurtjat int, pajjiż, li s-sultan tiegħek bin in-nobbli,

u l-kbarat tiegħek jieklu f’waqtu,

kemm jeħtieġu u bla tbahrid.

18Għal għażż l-għajnejn jisfronda s-saqaf;

għal għażż l-idejn joqtor l-ilma fid-dar.

19Biex jgħadduha tajjeb iħejju l-mejda,

u l-inbid iferraħhom,

u l-flus jagħmlu tajjeb għal kollox.

20Tisħetx lis-sultan lanqas ġo qalbek,

u tidgħix lis-setgħan lanqas fis-satra ta’ fejn torqod,

għax l-għasafar tal-ajru għandhom mnejn iġorru leħnek,

u t-tjur iwasslu kliemek.