ĠOB 6 - Maltese Bible with DC

Kapitlu 6Ġob jilminta mill-kobor ta’ tbatijietu

1Ġob wieġeb u qal:

2“Li kellu jintiżen l-għali tiegħi,

u f’miżien titqiegħed il-ħsara kollha tiegħi,

3itqal tkun din minn ramel il-baħar;

għalhekk kliem addoċċ jitlaq fommi.

4Għax weħlu fija l-vleġeġ ta’ Xaddaj,

u qed tixrob ruħi l-velenu tagħhom;

it-twerwir ta’ Alla tkeskes għal fuqi.

5Jaqaw jinħaq il-ħmar bil-ħaxix quddiemu?

Se jgħajjat il-gendus bl-għalf taħt geddumu?

6Jittiekel forsi bla melħ it-tisjir ħelu?

Fih xi togħma l-abjad tal-bajd?

7Ikel bħal dan ma jduqux ħalqi;

jitqażżu bħal ikel imħassar.

8Kemm nixtieq li Alla jisma’ talbi!

Kemm nixtieq jaqtagħli xewqti!

9Mhux li kien jaqtagħha li jtemmni,

jitlaq idu u jqaċċatni mid-dinja!

10Imqar hekk, jibqa’ għalija xi faraġ,

u nifraħ ukoll fl-eqqel tbatija,

għax ma ċħadtx kliem il-Qaddis.

11Imma x’saħħa għandi biex inżomm iebes?

X’tamiet għandi li ntawwal għomri?

12Hija saħħti saħħa taż-żonqor,

u ġismi jewwilla bronż?

13Mhux xejn hi l-qawwa li ngħin ruħi?

Mhux kull rifda twarrbet minni?

Ġob jaqta’ jiesu minn ħbiebu

15Iżda ħuti bħal wied qarrqu bija,

għabu bħal qiegħ il-widien

16li jkunu mqallgħin bil-ħalla tas-silġ,

xħin togħdos fihom il-borra;

17fl-istaġun tan-nixfa jixxuttaw,

bil-qilla tas-sħana jitqaxqxu.

18Lejhom idawru l-karwani r-rotta tagħhom,

jidħlu fl-inxif u jinqerdu.

19Jgħarrxu għalihom il-karwani ta’ Tema,

il-merkanti ta’ Saba jittamaw fihom.

20Imma jiregħxu talli ttamaw,

xħin jaslu ħdejhom jinstarmu.

21Issa tabilħaqq sirtu xejn għalija,

rajtu l-ħsara u qabadkom saram.

22Qatt għedtilkom tagħtuni xi ħaġa,

jew għalija tħallsu minn ġidkom?

23Teħilsuni minn dwiefer l-għadu,

jew tifduni minn idejn il-kiefra?

24Għallmuni, mela, u jiena niskot,

fehmuni fejn stajt mort żball.

25X’qawwa fih il-kliem sinċier!

Imma x’jiswa t-tmegħir tagħkom!

26Jaqaw intom il-kliem tridu tlumu,

u tqisu riħ kliem min qata’ qalbu?

27Intom sa fuq iltim titfgħu x-xorti,

u mqar ħabib tagħkom tinneguzjawh.

28Imma issa, nitlobkom, ħarsu lejja,

f’wiċċkom żgur li ma nigdibx.

29Erġgħu aħsbuha li ma ssirx inġustizzja.

Aħsbuha, hawn fin-nofs il-kawża tiegħi.

30Jinsab forsi xi qerq fuq ilsieni?

Tgħid ma jtigħemx ħalqi l-ħwejjeġ ħżiena?