1Imma int, o Alla tagħna, twajjeb u veru;
int kollok sabar, u tmexxi kollox bil-ħniena.
2Għax ukoll jekk nidinbu, aħna tiegħek u nistqarru setegħtek;
imma ma nidinbux, għax nafu li aħna tiegħek.
3Meta nagħrfu lilek, ikollna t-tjieba sħiħa,
u meta nistqarru setegħtek, naslu għall-ħajja bla tmiem.
4Għalhekk aħna ma tqarraqniex
la minn xogħol maħsub bis-sengħa ħażina tal-bniedem,
u lanqas mill-ħidma fiergħa taż-żebbiegħa,
daqsxejn ta’ xbieha mċappsa b’ħafna kuluri,
5li bid-dehra tagħha l-boloh jitqanqlu għall-ħażen,
imsaħħra mix-xbihat bla ruħ u ħajja.
6Nies li jħobbu ħwejjeġ ħżiena u li ħaqqhom tama bħal din,
huma dawk li jagħmluhom, dawk li jixtiquhom u dawk li jqimuhom.Il-frugħa tal-idolatrija
7Il-ħaddiem tal-fuħħar jitħabat u jagħġen it-tafal artab,
u minnu jaħdem ħwejjeġ li neħtieġu;
mill-istess tafal isawwar xorta waħda,
kemm dawk li bihom ninqdew bil-ġieħ
u kemm dawk li bihom ninqdew xort’oħra.
Min jagħġen it-tajn jaqtagħha
xi jkun l-għan ta’ kull ħaġa li jagħmel.
8U b’taħbit vojt mill-istess tafal isawwar alla fieragħ,
dak stess li ftit qabel sar mit-trab tal-art,
u ftit wara hemm jerġa’ jmur mnejn ittieħed,
meta jkollu jrodd ruħu mislufa lilu.
9Xejn ma jaħseb li dalwaqt imut
jew li ħajtu tulha qasir;
iżda ħsiebu li jilħaq ’il min jaħdem id-deheb u l-fidda,
irid jagħmel bħal min jaħdem il-bronż,
u jiftaħar għax jagħmel xbihat foloz.
10Ftit irmied qalbu, it-tama tiegħu tiswa anqas mit-trab,
u ħajtu anqas minn ftit tajn;
11għax hu m’għarafx min hu dak li ħalqu,
li nefaħ fuqu nifs ħabrieki,
u qiegħed ġo fih ir-ruħ tal-ħajja.
12Imma għalih ħajjitna hi logħba,
u l-għajxien tagħna suq tal-qligħ.
‘L-aqwa li naqlagħha tajjeb,’ jgħid,
‘b’kull mezz li nista’, imqar ħażin.’
13Aktar mill-oħrajn dan jaf bi dnubu;
għax jaħdem mit-trab tal-art fuħħar u allat fiergħa.
Il-kulti Eġizzjani14Imma wisq aktar boloh, u agħar minn moħħ it-tfal,
l-għedewwa kollha li għakksu l-poplu tiegħek.
15Għax laqgħu b’allat l-idoli kollha tal-ġnus,
li għandhom għajnejhom u bihom ma jarawx,
b’imnifsejhom ma jiħdux nifs,
bil-widnejn li għandhom ma jisimgħux,
bis-swaba’ ta’ jdejhom ma jħossu xejn,
u riġlejhom ma jiswew għal xejn.
16Bniedem hu li għamilhom,
wieħed b’ruħ mislufa sawwarhom.
U l-ebda bniedem ma jista’ jagħmel alla, imqar jekk ikun jixbah lilu stess.
17Ta’ bniedem li jmut, ħaġa mejta jista’ jagħmel b’idejh il-ħżiena,
għax hu nnifsu aħjar mix-xbihat li jqim;
hu għallanqas għandu l-ħajja, imma dawk ma jkollhom qatt.
18Iqimu wkoll bhejjem l-aktar moqżieża,
ħdejn bhejjem oħra bla moħħ, dawn agħar minnhom ilkoll.
19Lanqas bħala bhejjem ma fihom xi ġmiel li jogħġob l-għajn;
meta Alla faħħar u bierek il-ħlejjaq, dawn baqgħu barra.
Who We AreWhat We EelieveWhat We Do
2025 by iamachristian.org,Inc All rights reserved.
