ĠEREMIJA 50 - Maltese Bible with DC

Kapitlu 50Oraklu għal Babilonja

1Il-kelma li qal il-Mulej għal Babilonja u art il-Kaldin permezz tal-profeta Ġeremija:

2“Ħabbru lill-ġnus u xandru,

għollu stendard u xandru,

taħbu xejn imma għidu:

‘Babilonja ttieħdet,

Bel mistħi,

Merodak imħawwad,

allatha mistħija;

l-idoli tagħha mkissra.’

3Għax tiela’ għaliha poplu mit-Tramuntana,

u minn artha jagħmel ħerba.

Ma jkun hemm ħadd jgħammar fiha;

bnedmin u bhejjem telqu u ħarbu.

4F’dawk il-jiem u f’dak il-waqt,

oraklu tal-Mulej,

ulied Iżrael flimkien ma’ wlied Ġuda

jibku huma u ġejjin, għad jiġu jfittxu

lill-Mulej Alla tagħhom.

5Għal Sijon jistaqsu,

lejha jdawru wiċċhom:

“Ejjew nintrabtu mal-Mulej

b’patt għal dejjem ma jintesa qatt.’

6Merħla nagħaġ mitlufa l-poplu tiegħi;

ħarġuhom mit-triq ir-rgħajja tagħhom;

irħewlhom jiġġerrew fuq l-għoljiet,

minn muntanja għal għolja dejjem sejrin,

sa nsew il-maqjel tagħhom.

7Kien jiblagħhom kull min kien isibhom,

l-għedewwa tagħhom kienu jgħidu:

‘Aħna ma naħtu xejn għax huma dinbu kontra l-Mulej.

Mergħa tas-sewwa l-Mulej,

u t-tama ta’ missirijiethom.’

8Aħarbu minn nofs Babilonja,

mill-art tal-Kaldin, oħorġu

u kunu bħall-bdabad f’ras il-merħla.

9Għax, arani, se nqajjem u ntella’ għal Babilonja

ġemgħa ta’ ġnus kbar

mill-art tat-Tramuntana;

dawn jitqassmu kontra tagħha,

minn hemm jaħtfuha,

il-vleġeġ tagħhom bħal ta’ gwerrier tas-sengħa,

li qatt ma jerġa’ lura idu f’idu.

10U tkun il-kadilja priża,

u jixbgħu dawk li jisirquha,

oraklu tal-Mulej.

11Ifirħu! Aqbżu bil-ferħ!

Intom li sraqtu ’l wirti.

Iva! Aqbżu bħal għoġol fuq il-mergħa,

u iżhru bħal fħal.

12Imma ommkom waqgħet f’mistħija kbira,

dik li wilditkom waqqgħuha fl-għajb.

Arawha, ġiet l-aħħar fost il-ġnus,

saret deżert, art niexfa u xagħra.

13Minħabba l-għadab tal-Mulej,

ħadd ma jgħammar fiha;

kollha kemm hi tkun ħerba.

Kull min jgħaddi minn ħdejn Babilonja,

jibqa’ mistagħġeb u bla nifs

għall-ġerħiet li ġarrbet.

14Tqassmu kontra Babilonja dawramejt,

intom ilkoll li tiġbdu l-qaws.

Waddbulha l-vleġeġ; tibżgħux għalihom,

għax dinbet kontra l-Mulej.

15Għajtu kontriha minn kull naħa,

refgħet idejha,

waqgħu torrijietha,

ġġarrfu ħitanha.

Tassew, il-Mulej qed jitħallas minnha,

tħallsu minnha,

bħalma għamlet hi, agħmlu lilha.

16Eqirdu minn Babilonja lil min jiżra’,

lil min jaqbad il-minġel fi żmien il-ħsad.

Minn quddiem ix-xabla qattiela,

idur kull wieħed lejn il-poplu tiegħu,

u kulħadd jaħrab lejn artu.Iżrael jerġa’ lura lejn artu

17Nagħġa mitlufa kien Iżrael,

bl-iljuni jiġru warajha.

L-ewwel belagħha s-sultan tal-Assirja;

imbagħad Nabukodonosor,

sultan ta’ Babilonja, gerrmilha għadamha.”

18Għalhekk dan jgħid il-Mulej tal-eżerċti, Alla ta’ Iżrael:

“Arani, se nikkastiga s-sultan ta’ Babilonja

u ’l artu, bħalma kkastigajt is-sultan tal-Assirja.

19Imma rraġġa’ lura ’l Iżrael

lejn meragħtu.

Għad jirgħa fuq il-Karmel u f’Basan,

u fuq il-muntanji ta’ Efrajm u Gilgħad għad jixba’.

20F’dawk il-jiem u f’dak iż-żmien,

oralu tal-Mulej,

ifittxu l-ħażen ta’ Iżrael, u ma jsibuhx,

u d-dnubiet ta’ Ġuda, u ma jsibuhomx,

għax jien naħfer lil min inħalli ħaj.

21Itla’ għall-art ta’ Meratajm,

għaliha u għal min jgħammar f’Fekod.

Oqtol u eqred li jibqa’,

oraklu tal-Mulej,

u agħmel kulma ordnajtlek.

22Ħsejjes ta’ gwerra fil-pajjiż,

u qerda kbira.

23Kif tkisser u tfarrak il-martell tal-art kollha!

Kif saret waħx Babilonja fost il-ġnus!

24Insabtlek, u int inqbadt,

Babilonja, u int ma ntbaħtx.

Sibtek u qbadtek,

għax int ħadtha kontra l-Mulej.

25Il-Mulej fetaħ il-maħżen tiegħu,

u ħareġ l-armi tal-korla tiegħu,

għax għandu x’jagħmel il-Mulej

f’art il-Kaldin.

26Ejjew għaliha minn truf l-art,

u iftħu mħażen qmuħha.

Geddsu kollox bħal munzell,

u eqirdu kollox, li minnha ma jibqa’ xejn.

27Oqtlu l-gniedes kollha,

ħa jinżlu għall-biċċerija.

Gwaj għalihom,

għax waslilhom il-Jum,

żmien il-kastig.

28Isma’! Il-maħrubin

u l-meħlusin minn art Babilonja,

marru jħabbru f’Sijon

il-vendetta tal-Mulej, Alla tagħna,

il-vendetta għat-tempju tiegħu.

29Sejħu l-arċieri kontra Babilonja,

lil dawk kollha li jiġbdu l-qaws;

waqqfu l-kamp madwarha,

biex ħadd ma jeħles minnha.

Ħallsuha skont ma għamlet,

għamlulha skont għemilha.

Għax iżżarġnet kontra l-Mulej;

kontra l-Qaddis ta’ Iżrael.

30Għalhekk jaqgħu ż-żgħażagħ tagħha

mejta fil-pjazez tagħha,

u jintemmu l-gwerriera dakinhar,

oraklu tal-Mulej.

31Arani, wieqaf quddiemek, ja mżarġna,

oraklu ta’ Sidi l-Mulej tal-eżerċti.

Wasal il-Jum tiegħek,

żmien kastigek.

32U l-imżarġna togħtor u titgerbeb,

u ma jkunx hemm min iqajjimha.

Nagħti n-nar lil blietha,

u jibla’ l-inħawi kollha ta’ madwarha.

33Dan jgħid il-Mulej tal-eżerċti:

‘Imgħakksin ulied Iżrael,

u wlied Ġuda magħhom.

Dawk kollha li ħaduhom fl-eżilju,

jgħassu fuqhom, ma jridux jitilquhom.’

34Imma l-Feddej tagħhom b’saħħtu,

Jaħweh tal-eżerċti jismu.

Jiddefendi l-kawża tagħhom,

biex jikkwieta d-dinja,

imma jħawwad in-nies ta’ Babilonja.

35Xabla għal fuq il-Kaldin,

oraklu tal-Mulej,

u għal fuq in-nies ta’ Babilonja;

u għal fuq il-prinċpijiet

u l-għorrief tagħha.

36Xabla għal fuq dawk li jeħbru

ħalli jiġġennu.

Xabla għal fuq il-gwerriera tagħha,

ħalli jitwerwru.

37Xabla għal fuq iż-żwiemel

u l-imriekeb tagħha;

u għal fuq il-poplu mħallat

li hemm f’nofsha;

ħa jsiru bħan-nisa.

Xabla għal fuq l-imħażen tagħha,

ħa jisirquhom.

38Xabla għal fuq l-ilmijiet ħalli jinxfu.

Għax art l-idoli hi,

u jiftaħru bil-babaw.

39Għalhekk għad jgħammru fiha

l-bhejjem tax-xagħri u x-xakalli,

u hemm joqogħdu n-ngħam.

Qatt iżjed ma tkun mgħammra,

u aktar fiha ma joqgħod ħadd,

minn żmien għal żmien.

40Bħal meta Alla qered lil Sodoma u lil Gomorra,

u l-ibliet tal-qrib,

oraklu tal-Mulej,

hekk ħadd iżjed ma jgħammar hemm,

u ebda bniedem ma joqgħod fiha.

41Araw, poplu ġej mit-Tramuntana,

ġens kbir u kotra slaten

jitqanqlu minn truf id-dinja.

42Il-qaws u l-vleġeġ jaqbdu;

kiefra, nies bla ħniena,

għajjathom ikarwat bħall-baħar,

u ż-żwiemel jirkbu.

Lesti bħal bniedem wieħed għat-taqtigħa,

għalik, bint Babilonja!

43Sama’ s-sultan ta’ Babilonja b’aħbarhom,

u ntelqu idejh,

qabditu d-diqa,

l-uġigħ ta’ mara fil-ħlas.

44Arah, bħal iljun tiela’

mill-masġar tal-Ġordan,

għall-mergħat dejjiema,

hekk f’tebqa t’għajn jiena nħarrbu minnu,

u nqiegħed fuqu l-maħtur tiegħi.

Għax min hu bħali?

Min se jħarrikni?

Min hu r-ragħaj li se jiqafli?

45Għalhekk isimgħu fehmet il-Mulej

li għamel għal Babilonja,

u l-ħsieb li għandu

għal dawk li jgħammru f’art il-Kaldin.

Iva, ikaxkrulhom iż-żgħar tan-nagħaġ tagħhom.

Iva, ħerba ssirilhom mergħathom.

46Titheżżeż l-art mal-ħoss

tal-waqgħa ta’ Babilonja,

u l-għajta tagħha tinstama’ fost il-ġnus.”