PROVERBJI 18 - Maltese Bible with DC

1Min irid jinfired mill-oħrajn jara x’jaqla’,

u għal kull xejn jiġġieled.

2L-iblah ma jħobbx jimxi bl-għaqal,

irid biss juri fehemtu.

3Il-ħażen iġib it-tmaqdir miegħu;

jiġi l-għajb fuq min jitlef ġieħu.

4Kliem l-għaref bħal ilma fond,

għajn l-għerf nixxiegħa ta’ ilma ħaj.

5Mhux sewwa raġun tagħti lill-ħażin,

biex tagħti tort lill-ġust fil-ħaqq.

6Kliem l-iblah jaqla’ l-inkwiet,

kliem fommu jġib il-ġlied.

7Bi kliemu l-iblah jiġġarraf,

fommu xibka għalih innifsu.

8Kliem ix-xewwiex bħal ikel bnin,

li jinżel sa qiegħ l-istonku.

9Min jitnikker fuq xogħlu,

jiġi ħu dak li jġarraf.

10Isem il-Mulej hu torri qawwi;

fih jistkenn il-ġust b’moħħu mistrieħ.

11Ġid l-għani hu belt qawwija għalih;

jistħajlu sur għoli madwaru.

12Il-bniedem jitkabbar, sakemm ma jaqax,

biex tasal għall-ġieħ, trid tiċċekken.

13Min iwieġeb qabel ma jisma’,

bluha jagħmel u mistħija jkollu.

14Min hu ta’ kuraġġ jiflaħ għall-mard,

imma min qalbu maqtugħa, biex jintrefa’?

15Moħħ miftuħ jikseb l-għerf;

l-għorrief jagħtu widen għat-tagħlim.

16Min jagħti r-rigali jiftaħ it-triq quddiemu,

u jibqa’ dieħel sa quddiem il-kbar.

17Min jitkellem l-ewwel taħsbu għandu raġun,

sakemm ħaddieħor jgħarblu u jistaqsih.

18Bix-xorti twaqqaf il-ġlied,

u taqta’ min għandu raġun f’tilwima kbira.

19Ħuk imweġġa’ jsir għalik bħal belt qawwija,

u l-ġlied iebes daqs bieb ta’ fortizza.

20Bi frott kliemu jixba’ l-bniedem,

bi kliem fommu jaqla’ x’jiekol.

21Fis-setgħa ta’ lsien il-mewt u l-ħajja,

min jinqeda bih tajjeb jiekol minn frottu.

22Min isib mara jsib il-ġid,

u jikseb il-barka tal-Mulej.

23Il-fqir jitlob bil-ħniena,

u l-għani jwieġeb bil-herra.

24Hemm ħbieb tal-isem biss;

ħabib tassew jintrabat miegħek aktar minn ħuk.