BIN SIRAK 6 - Maltese Bible with DC

Kapitlu 6

1għax isem ħażin iġib miegħu għajb u twiddib;

hekk jiġrilu min jgħid issa ħaġa u issa oħra.

2Titkabbarx għax moħħok jgħidlek hekk,

li ma tmurx daqs barri ttertaq ruħek.

3Taħli l-weraq tiegħek u teqred il-frott tiegħek,

u tispiċċa qisek zokk niexef.

4Karattru ħażin jeqred il-bniedem,

u jwaqqgħu għal żufjett l-għedewwa tiegħu.

Il-ħbiberija vera

5Fomm li jagħti gost ikattar il-ħbieb,

u lsien jitkellem tajjeb ikollu ħafna min jirrispettah.

6Ħa jkunu ħafna dawk li jsellmulek,

imma wieħed f’elf dawk li jagħtuk parir.

7Meta tikseb ħabib, iksbu wara li tkun ġarrabtu,

u tkunx mgħaġġel biex tafda fih.

8Għax hemm min hu ħabib meta jaqbillu,

u ma jiqafx miegħek dakinhar tal-għawġ tiegħek;

9u hemm il-ħabib li jinbidel f’għadu,

u b’għajb tiegħek jikxef li għandu tilwima miegħek;

10u hemm il-ħabib li joqgħod miegħek mal-mejda,

imma ma jiqafx miegħek dakinhar tal-għawġ;

11fit-tajjeb tiegħek ikun qisu int,

u b’wiċċu minn quddiem jikkmanda lill-qaddejja tiegħek;

12imma jekk tkun magħkus, idur kontrik

u jinħeba minn quddiem wiċċek.

13Inqata’ mill-għedewwa tiegħek,

u oqgħod b’seba’ għajnejn fuq ħbiebek.

14Kenn sod il-ħabib ta’ min jafda fih,

u min isib wieħed ikun sab teżor.

15Ma tibdlu ma’ xejn ħabib tafdah,

u m’għandekx kejl biex tkun taf xi jsarraf.

16Duwa tal-ħajja ħabib tafdah,

u jsibu minn jibża’ mill-Mulej.

17Min jibża’ mill-Mulej imexxi tajjeb il-ħbiberija tiegħu,

u kif ikun hu, ikun ħabibu.It-taħriġ fl-għerf

18Ibni, minn ċkunitek agħżel li titgħallem,

u sa ma jibjad xagħrek issib l-għerf.

19Idħol għalih bħal wieħed jaħrat u jiżra’,

u stenna l-frott bnin tiegħu;

għax meta taħdem għalih tegħja ftit,

imma ma ddumx ma tiekol mill-frott li jagħmel.

20Hu aħrax ħafna ma’ min hu bla tagħlim,

u min hu bla moħħ ma joqgħodx miegħu:

21għax l-għerf jagħfas fuqu bħal blata tqila,

u ma jitlifx żmien biex jeħles minnha.

22Għax l-għerf ismu miegħu,

lil ħafna ma jidhrilhomx.

23Agħti widen, ibni, u ilqa’ fehemti,

u tiċħadx il-parir li nagħtik.

24Qiegħed riġlejk fil-ktajjen tal-għerf,

u għonqok fl-irbit tiegħu;

25agħti spalltek ħa ġġorr il-piż tiegħu,

u tiddejjaqx mill-ilġiem tiegħu.

26Ejja għandu b’ruħek kollha,

u b’ħiltek kollha żomm fi triqatu.

27Stħarreġ għalih u fittxu, u ssir tafu,

u meta jiġi taħt idejk, titilqux;

28għax fl-aħħar issib il-mistrieħ li jagħti,

u jinbidel f’ferħ għalik;

29u jkunu għalik il-ktajjen bħal kenn sod,

u l-irbit tiegħu bħal lbies ta’ glorja.

30Il-madmad tiegħu tiżjin tad-deheb,

u lġiemu ħabel tal-porpra.

31Tilbsu daqskieku lbies ta’ glorja,

u tqiegħdu fuqek daqskieku kuruna ta’ ferħ.

32Jekk tixtieq, ibni, tista’ titgħallem,

u jekk tagħti saħħtek għalih, tkun moħħok jilħaqlek.

33Jekk tħobb tisma’, titgħallem;

u jekk tagħti widen, issir għaref.

34Oqgħod fejn jiltaqgħu x-xjuħ;

u fejn hemm xi għaref oqgħod ħdejh.

35Agħti widen għal kull kelma ta’ Alla,

u qwiel ta’ għaqal m’għandhomx jaħarbulek.

36Jekk issib xi bniedem li jifhem,

bakkar biex tmur għandu;

u saqajk jaħfu l-għatba ta’ biebu.

37Ikun moħħok fil-kmandamenti tal-Mulej,

u aħseb dejjem fil-preċetti tiegħu;

hu jqawwilek qalbek,

u tinqatagħlek ix-xewqa li tkun għaref.