1“Għax, ara, f’dawk il-jiem, f’dak iż-żmien,
li fih inġedded ’il Ġuda u ’l Ġerusalemm,
2jiena niġbor il-ġnus kollha,
u nniżżilhom fil-Wied ta’ Ġosafat;
hemmhekk nagħmel ħaqq minnhom
minħabba f’Iżrael, il-poplu u l-wirt tiegħi,
li huma xerrdu fost il-ġnus,
u għax il-pajjiż tiegħi qassmuh bejniethom,
3u tefgħu x-xorti fuq il-poplu tiegħi;
’l uliedhom subien bidluhom man-nisa żienja,
u ’l uliedhom bniet biegħuhom għall-inbid biex xorbuh”.
Tehdid kontra l-Feniċi u l-Filistej4“U intom ukoll, Tir u Sidon, x’intom għalija?
U l-inħawi kollha tal-Filistja?
Se tagħmlu vendetta intom minni? Imma jekk
tagħmlu vendetta intom minni,
fis ngħaġġel irroddhielkom fuq irjuskom!
5Intom ħtaftu l-fidda u d-deheb tiegħi,
ħadtu l-egħżeż u l-aħjar minn ħwejġi
għat-tempji tagħkom,
6intom lil ulied Ġuda u Ġerusalemm
begħtuhom lil ulied il-Griegi,
bl-għan li tbegħduhom minn arthom!
7Ara, se nqanqalhom minn fejn begħtuhom intom,
u d-deni tagħkom irroddhulkom fuq irjuskom.
8U lil uliedkom, kemm subien kemm bniet,
inbigħhom jien f’idejn ulied Ġuda;
u huma jbigħuhom lin-nies ta’ Saba,
lil ġens imbiegħed;
hekk tkellem il-Mulej!”Sejħa tal-ġnus
9Xandru dan fost il-ġnus:
Ħejju għall-gwerra qaddisa!
Qajmu l-qalbenin!
Ħa jersqu, ħa jitilgħu
l-irġiel kollha tal-gwerra!
10Is-sikek tagħkom dewbuhom fi sjuf,
l-imnieġel tagħkom f’lanez.
Ħa jgħid id-dgħajjef: “Jien qalbieni!”
11Ħaffu u ejjew,
intom ġnus kollha ta’ madwar,
u nġabru hemm!
Niżżel, Mulej, il-qalbenin tiegħek!
12Ħa jitqanqlu l-ġnus u jmorru
fil-Wied ta’ Ġosafat!
Għax hemm se noqgħod biex nagħmel ħaqq
mill-ġnus kollha ta’ madwar.
13Ressqu l-minġel;
għax laħaq il-ħsad!
Ejjew, isħqu b’riġlejkom,
għax mimli l-magħsar;
il-btieti mfawrin,
għax kbira ħżunithom!Jum il-Mulej
14Rassa bla qjies
f’wied is-sentenza!
Għax Jum il-Mulej fil-qrib
f’wied is-sentenza.
15Ix-xemx u l-qamar jiddallmu,
u l-kwiekeb jitilfu dijiethom.
16Il-Mulej iriegħed minn Sijon,
isamma’ leħnu minn Ġerusalemm;
u s-smewwiet u l-art jitriegħdu!
Iżda l-Mulej ikun għall-poplu tiegħu kenn,
ikun fortizza għal ulied Iżrael!
17“Imbagħad tagħrfu li jien il-Mulej, Alla tagħkom,
li ngħammar f’Sijon, il-muntanja mqaddsa tiegħi!
Ġerusalemm tkun post qaddis,
qatt iżjed ma jgħaddu minnha l-barranin!Żmien l-hena tat-tiġdid ta’ Iżrael
18U jiġri dakinhar,
il-muntanji jqattru l-inbid ġdid,
l-għoljiet inixxu l-ħalib,
u l-widien kollha ta’ Ġuda
ifuru bl-ilmijiet.
U minn dar il-Mulej tnixxi għajn
Li ssaqqi Wied Sittim.
19L-Eġittu jsir ħerba waħda,
Edom jinbidel f’deżert li jbikki,
minħabba fil-moħqrija li wrew ma’ wlied Ġuda
meta xerrdu demmhom bla ħtija f’arthom.
20Imma art Ġuda tkun mgħammra għal dejjem,
u Ġerusalemm għal dejjem ta’ dejjem.
21U nitħallas minn demmhom
li s’issa għadni ma tħallastx minnu
u l-Mulej jgħammar f’Sijon.”
Who We AreWhat We EelieveWhat We Do
2025 by iamachristian.org,Inc All rights reserved.
