ĠOB 10 - Maltese Bible with DC

Kapitlu 10

1“Ladarba ħajti nistmellha,

irrid niftaħ il-bieb għat-tgemgim tiegħi,

inferragħ l-imrar ta’ ruħi.

2Ngħid lil Alla: “Tikkundannanix,

urini l-għala għandek għalija.

3Hu sewwa għalik li tagħsarni,

li tmaqdar xogħol idejk,

u tgħin il-ħsibijiet tal-ħżiena?

4Għandek int għajnejn tal-laħam,

jew tħares kif iħarsu l-bnedmin?

5Hu għomrok qasir bħal għomor il-bniedem,

u jgħaddu bħal jiemu sninek?

6Int, li tgħarrex għan-nuqqas tiegħi

u tfittixli d-dnub tiegħi,

7int taf tajjeb li jien bla ħtija,

u li ħadd minn taħt idejk ma jeħlisni.

8Kienu jdejk li sawruni u għamluni;

issa bdielek u trid teqridni?

9Ftakar li għamiltni bħal mit-tafal,

u li lejn it-trab għad treġġagħni.

10Mhux bħall-ħalib sawwabtni

u bħall-baqta għaqqadtni,

11bil-ġilda u l-laħam libbistni,

u nsiġtni bl-għadam u bl-għeruq?

12Ħajja tajtni u favuri għamilt miegħi,

u l-providenza tiegħek ħarsitli ruħi.

13Iżda ħbejt xi ħaġa f’qalbek;

issa naf li din kellek f’moħħok.

14Jekk nidneb, int tkun għassa tiegħi

biex ma tħallix għaddejja l-ħtija tiegħi.

15Jekk ninstab ħati, ħażin għalija,

jekk bla ħtija, lanqas nerfa’ rasi,

miksi bl-għajb u mgħargħar fin-niket.

16Jekk nerfa’ rasi, qisek iljun toħroġ għalija

u qawwietek terġa’ turi fuqi.

17Iġġedded kontrija l-ġlied tiegħek,

u l-għadab iżżid kontrija,

bi qtajja’ ġodda jitqabdu miegħi.

18Għalfejn mela ħriġtni mill-ġuf?

Messni mitt bla ma għajn qatt ratni;

19messni kont qisni qatt ma kont;

meħud dritt mill-ġuf għall-qabar.

20Mhux ħaġa żgħira huma jiem ħajti?

Erħini, mela, ħa nduq ftit l-hena,

21qabel ma mmur u ma niġix lura,

lejn art id-dlam u d-dellijiet,

22art imgħargħra fis-swied u t-taħwid,

fejn id-dawl hu nnifsu dlam.”