Zaburi 95 - Swahili Congo Revised Bible 2002

Wimbo wa kumusifu Mungu

1Mukuje tumwimbie Yawe,

tumushangilie yeye kikingio na mwokozi wetu!

2Tuende mbele yake na nyimbo za shukrani;

tumushangilie kwa nyimbo za sifa.

3Maana Yawe ni Mungu mukubwa;

yeye ni mufalme mukubwa juu ya miungu yote.

4Mabonde ni katika mikono yake,

vilele vya milima ni vyake.

5Bahari ni yake, ndiye aliyeifanya;

kwa mikono yake aliumba inchi kavu.

6Mukuje tuiname chini na kumwabudu;

tumupigie magoti Yawe, Muumba wetu!

7Maana yeye ni Mungu wetu.

Sisi ni watu wake,

kondoo wanaochungwa katika malisho yake.

Heri leo mungesikiliza hivi anavyosema:

8“Musikuwe wagumu kama kule Meriba,

kama ilivyokuwa kule Masa katika jangwa,

9babu zenu waliponijaribu na kunipima,

ingawa walikuwa wameona mambo niliyowatendea.

10Kwa miaka makumi ine nilichukizwa nao,

nikasema: ‘Kweli, hawa ni watu waliopotoka!

Hawajali kabisa njia zangu!’

11Basi, nikaapa kwa kasirani kwamba

hawataingia kwenye mapumziko niliyowatayarishia.”