APOCALIPSIS 22 - Quichua Imbabura 2016

1Chai jipami, causaita caraj, na mapayashca, espejoshna punchapamba jatun yacu rijujta ricuchihuarca. Chai yacuca, Taita Diospash, Llamagupash, mandashpa tiyajuj jatun tiyarinamandami llujshijurca.

2Chai pueblopaj chaupi ñambica, jatun yacu rijuj ishcandi manñapimi, causaita caraj quiru shayajurca. Chai quiruca, tucui quillacunapimi, huatapica chunga ishcaicaman fucujurca. Chai quirupaj fangapash, tucui llacta gentecunapaj jambimi carca.

3Chaipica, ima na alipash napacha tiyangachu. Chaipimi, Taita Diospajpash, Llamagupajpash mandangapa tiyarinaca tiyajunga. Paipajta rurajcunami, Paitaca ninanda alicachinajunga.

4Diostapash, ñavi ñavimi ricunajunga. Diospaj shutitapash, paicunapaj frentepi churashcami canga.

5Chaipica, tutapash na ashtahuan tiyangachu. Lámpara michapash, indipash na ashtahuan punchayachina tiyangachu. Mandaj Taita Diosmi, paicunataca punchayachijunga. Paicunaca, causaita causaicamanmi mandanajunga.

Jesucristoca ñallami shamunga

6Chai angelca cashnami nihuarca: “Cai ñuca villashca shimicunaca, na llullaj cashpami pactanga. Profetacunaman, espirituta caraj Mandaj Taita Diosllatami, Paipaj angelta cachamurca. Ñalla ima tucunata, Paipajta rurajcunaman ricuchijuchunmi chashna cachamurca” nihuarcami.

7“¡Ricuichi, ñapashmi shamusha! Jipaman ima tucunata Dios villashpa, cai libropi quilcashca shimicunata cazujcunaca, ninanda cushijuichi”.

8Juanmi cani. Ñucami, cai tucuita uyarcani, ricurcani. Shina uyashpa, ricushpaca, cashna tucunacunata ñucaman ricuchijuj angelpaj ñaupajpimi, paita ninanda alicachingapa cungurircani.

9Ashtahuangarin paica, cashnami nihuarca: “Ricui, na chashna ruranachu cangui. Ñucapash canshnallata, cambaj huauqui profetacunashnallata, cai libropi quilcashca shimicunata cazujcunashnallata, Diospajta rurajmi cani. Taita Diostallami alicachina cangui” nihuarcami.

10Chai angelca, cashnatapashmi nihuarca: “Jipa punlla ima tucunata villashpa quilcashcataca, na pacalla saquinachu cangui. Chaicuna pactana punllacunaca, ñami chayamujun.

11Na alita rurashpa causajca, na alita rurashpa catijuchun saquilla. Mapata rurashpa causajpash, mapata rurashpa catijuchun saquilla. Shinallata, alitalla rurashpa causajpash, alitalla rurashpa catijunallami. Diospajlla causajushpaca, ashtahuan Diospajlla causashpa catijunallami” nihuarcami.

12“Ricuichi, Ñucaca ñapashmi shamusha. Imatalla rurashcamanda, tucui cangunaman cuna cashcataca apashpami shamusha.

13Ñucami, A letrashna, Z letrashna cani. Callaripash, tucuripashmi cani. Tucuita callarichijpash, tucuita tucuchijpash, Ñucallatami cani.

14Churajunata tajshajshna, na alita ruranata saquijcunaca ninanda cushijuichi. Cangunami, causaita caraj quirumandaca micunguichi. Shinallata, cangunami pueblo pungucunata yaicuitapash ushanguichi.

15Ashtahuangarin, alcushna causajcuna, brujucuna, huainayajcuna, huañuchijcuna, rurashcalla dioscunata mañajcuna, llullashpalla causajcunaca, canllapimi saquiringa.

16Jesusmi cani. Ñucata crij tandanajujcunaman cai shimicunata villachunga, Ñuca angeltami cachamurcani. Ñucami sapishna, Davidpaj miraipura cani. Tutamanda punchapamba llujshimuj luzeroshnami cani” nircami.

17Diospaj Espiritupash, Llamagupaj huarmipashmi: “Shamupailla Jesús” ninajun. Maijambash cai villashcata uyashpaca: “Shamupailla” ninami canguichi. Maijambash yacuta ufiangapa munashpaca, shamushpa, causaita caraj yacuguta yanga ufiaichilla.

18Jipaman ima tucunatapash, cai libropi quilcachishca shimicunata tucui uyajcunamanmi, cashna villani: Cai villashca shimicunata pipash mirachijpica, Taita Diosca, cai libropi quilcachishca llaquichinacunatami paicunaman cachamunga.

19Shinallata, jipaman ima tucunatapash, cai libropi quilcachishca shimicunamanda pipash anchuchijpica, causaita causagrinata villajuj libropi pai imata japigrinatapash, Taita Diospajlla shicanyachishca pueblopi, pai imata japigrinatapashmi, Taita Diosca anchuchinga.

20Cai shimicunata villaj Ñucami: “Ari, ña shamushapachami” nijuni.

Chashna cachun. Ari, shamupailla, Apunchi Jesús.

21Ñucanchi Apunchi Jesucristopaj ninan juyaipash, tucui cangunahuan cachunmi munapani. Chashna cachun.