JEREMÍAS 34 - Quichua Imbabura 2016

Jeremías, Sedequías runata shinlli tacurishcamanda

1Babilonia llactata jatun mandaj Nabucodonosor runaca, paipaj macanajuj runacunandi, pai mandajpi causanajuj shuj llactacunata mandajcunandimi shamurca. Chai tucui gentecunandi shamushpami, Jerusalenbi causajcunahuan, caishuj pueblocunapi causajcunahuambash macanajurca. Chai punllacunapimi Mandaj Diosca, cai shimicunata Jeremiasman cashna nishpa villarca:

2“Israelcunata Mandaj Dios Ñucami, cashna nini: ‘Judá llactata jatun mandaj Sedequías runapajman ucha rishpa, cashna nigri: Mandaj Diosca, cashnami nin: Cai pueblotaca, Ñucami Babilonia llactata jatun mandajman cugrini. Paica, tucuillata rupachishpami tucuchigrin.

3Paipaj maquimandaca, cambash napacha quishpiringuichu. Ashtahuangarin prezu apai tucushpami, paipaj maquipi churai tucungui. Babilonia llactata jatun mandajtaca, ñavi ñavi ricunguipachami. Canga, paihuan chimbapura rimangapami, Babilonia llactaman apai tucungui ninmi.

4Shina cajpipash, Judá llactata jatun mandaj Sedequías runalla, Mandaj Dios rimashcataca uyanami cangui. Mandaj Diosca, candaca cashnami nin: Canga, na espadahuan huañuchi tucunguichu.

5Canga, ali huañuitami charingui. Cambaj ñaupa taitacunaca, punda jatun mandajcunatashnami, mishquilla ashnajuncunata rupachishpa pambanga. Shinallata: ¡Aij, ñucanchi mandajlla! nishpami, ninanda huacanajunga. Ñucami cai shimicunataca, chashna villani’ Mandaj Dios Ñucami, cai shimicunataca villani ninmi” Ningui nihuarcami.

6Profeta Jeremiasca, Judá llactata jatun mandaj Sedequías runamanmi, tucui cai shimicunata Jerusalenbi villajurca.

7Babilonia llactata jatun mandajpaj macanajuj runacunaca, Jerusalenbi causajcunahuan, Judá llactapi puchushca pueblocunapi causajcunahuan, Laquis, Azeca shuti pueblocunapi causajcunahuanmi macanajurca. Judá llactapica, muyundi jatun pircahuan jarcashca pueblocunamandaca, chai pueblocunallami puchushca carca.

Gañan tucushpa causajcunata na cacharishcamanda

8Jatun mandaj Sedequías runaca, tucuicunata cacharingapami, Jerusalenbi causaj tucui gentecunahuan ari nijurca. Chai jipami Mandaj Diosca, cai shimicunata Jeremiasman villarca.

9Gañangunataca, huarmicuna cajpi, jaricuna cajpipash, hebreo gentecunataca, cacharinallami canguichi. Cangunapura, judiocunataca napacha gañanda charinachu canguichi.

10Chashna nijta, mandajcunapash, tucui shuj gentecunapash uyashpami, gañangunataca, jaricuna cajpipash, huarmicuna cajpipash cacharinajurca.

11Shina cacharishca jipaca, yangallatami cacharishcanchi nishpami, jaricunatapash, huarmicunatapash cutin gañanman tigrachinajurca.

12Mandaj Diosca, Jeremiastaca cashnatapashmi nirca:

13“Israelcunata Mandaj Diosca, cashnami nin: ‘Ñucaca, cangunapaj ñaupa taitacunahuanga, Egipto llactapi gañan tucushpa causanajushcamanda llujchimujui punllapimi, cashna nishpa pactachingapa ari nircanchi:

14Hebreopuratallata, cangunapaj gañan cachun randishca cashpaca, canchis huatapica cacharinami canguichi. Sucta huatata cangunapajta rurashpa causashca cajpica, cacharinallami canguichi. Ashtahuangarin cangunapaj ñaupa taitacunaca, chaitaca na pactachingapa munarcachu.

15Cangunaca, tucuicunallatami cangunapaj gañangunata cacharishun nishpa, Ñuca ñaupajpi pactachingapa ari nircanguichi. Chaita rurangapaca, Ñuca shutipi mañana Ñuca huasipimi, ari nircanguichi.

16Ashtahuangarin, Ñuca shutita yangapi churashpami, cangunapaj gañangunataca, huarmicuna cajpipash, jaricuna cajpipash, cacharishpapash, cutin tigrashpa gañanda charircanguichi’ ninmi” nijurcami.

17Chashna rurashcamandami, Mandaj Diosca cashna nin: “Cangunaca, cangunapaj huauquicunata, gañan cashcamanda cacharishun nishcataca na pactachishpami causanajunguichi. Chaimandami, espadahuan, jatun ungüihuan, yarjaihuan llaquichi tucunatapash, cangunapajman cachamugrini. Cangunataca, tucui llactacunapi na alicachishpa rimanajuchunmi saquigrini. Mandaj Dios Ñucami, chashna nini.

18Shicuta huañuchishpa ishcaipi chaupishpa, chai chaupita yalishpami, Ñuca ñaupajpi cushijushpa pactachingapa ari ninajurca. Chashna cashpapash, Ñucahuan ari nishcata yangapi churashpa, na pactachishcamandami, llaquipi churagrini.

19Judá llactata cati mandajcuna, Jerusalén pueblota cati mandajcuna, shuj mandajcuna, sacerdotecuna, cai llactapi causaj tucui gentecunapashmi, shicuta huañuchishpa ishcaipi shicanyachishca chaupita yalinajurca. Paicunatapashmi, chashnallata llaquichigrini.

20Paicunata fiñashpa huañuchingapa munajcunapaj maquipimi churagrini. Paicuna huañushcataca, angacuna, sacha animalcunami micunga.

21Cai Judá llactata jatun mandaj Sedequías runatapash, cati mandajcunatapash, paita fiñashpa huañuchingapa munajujcunapaj maquipimi churasha. Cai llactamanda tigrashpa rishca, Babilonia llactata jatun mandajpaj macanajuj runacunapaj maquipimi churasha.

22Paicunataca cutinmi cai puebloman tigrachimusha. Paicunami, cangunataca macanajushpa mishashpa, cai pueblotapash rupachishpa tucuchinga. Shinallata, Judá llactapi tiyaj pueblocunapica, tucuillata huañuchishpa tucuchijpimi, jichushca saquiringa” ninmi Mandaj Diosca.