1Filisteocunaca, Israelcunahuanmi macanajurca. Israelcunaca, mishai tucushpa pacajushpa calpanajujpimi, filisteocunaca, Gilboa shuti urcupi japigrishpa huañuchinajurca.
2Filisteocunaca, Saulta catishpa rishpami, Jonatán, Abinadab, Malquisúa shuti Saulpaj churicunataca huañuchirca.
3Ashtahuan ninandapacha Saúl runahuan macanajushpami, flechata cacharijcunaca, paita chayachijpi, Saulca, ninandapacha manllarirca.
4Chaimandami Saulca, paipajta ruraj runataca, cashna nirca: “Cambaj espadata llujchishpa, huashaman yalijta tujsishpa huañuchihuai. Circuncisionda na rurashca runacuna huañuchishpa, ñucata asinajuchunga napacha munanichu” nirca. Ashtahuangarin, paipajta ruraj runaca, ninanda manllashpami, na huañuchingapa munarca. Chaimandami Saulca, paipaj espadata japishpa, chai espadata shayachishpa chai jahuapi shitarirca.
5Saúl ña huañushcata ricushpami, jarcarina jirruta apaj runapash, chashnallata huañurca.
6Chashnami Saulca, quimsa paipaj churicunandi, paipajta ruraj runandi, tucuilla paita catij runacunandi, chai punllapica huañurca.
7Shinamandami, pugru pamba chimbaman causajcunapash, Jordán yacu chimbaman causajcunapash, macanajuj Israelcuna pacajushpa rishcata yachaj chayarca. Shinallata, Saultapash, paipaj churicunatapash huañuchishcata yachashpami, paicuna causanajuj pueblocunata saquishpa pacajungapa rinajurca. Shinamandami filisteocunaca, chai pueblocunaman shamushpa causanajurca.
8Chai cayandi punllami filisteocunaca, huañushcacuna imatalla charishcata apangapa shamushpaca, Saultaca, paipaj quimsa churicunandi, Gilboa urcupi huañushca sirinajujta ricurca.
9Chaipimi, Saulpaj umata fitishpa, pai macanajunata charishcataca aparca. Filisteocunaca, tucui llactacunapi villachunmi cacharca. Paicunapaj rurashcalla dioscuna tiyaj huasicunapipash, chai pueblopi causajcunamambash villachunmi cacharca.
10Shinallata, Saulpaj macanajunataca, Astarot shuti huarmi diospaj huasipimi churarca. Paitapash, Bet-san shuti pueblo pircapimi huarcurca.
11Ashtahuangarin, Galaad llactapi tiyajuj Jabes shuti pueblopi causajcunaca, filisteocuna, Saulta chashna rurashcatami yachaj chayarca.
12Shina cajpimi, macanajunata ali yachaj runacuna, tucui tuta shamushpa, Bet-san shuti pueblo pircapi huarcushca Saúl huañushcatapash, paipaj churicuna huañushcatapash uriajuchishpa, Jabes shuti puebloman apashpa, chaipi rupachirca.
13Chai jipami, paicunapaj tullucunataca, Jabes shuti pueblopi tiyajuj shuj quiru ucupi pambashpa, canchis punllacaman na micunajurca.
Who We AreWhat We EelieveWhat We Do
2025 by iamachristian.org,Inc All rights reserved.
