1Mandaj Diosmi mandajun,
Cai pachapi causajcuna ninanda cushijuichi.
Mama cuchapi tiyaj llactacunapash ninanda cushijuichi.
2Diosca, fuyupash, yana tutapash muyushcapimi tiyajun.
Paica, alitalla rurashpa, aliguta ricushpami mandajun.
3Paitaca, ninami ñaupashpa rijunga.
Chai ninami, Paita fiñajcunataca tucuchijunga.
4Paipaj punchapamba ushaimi, cai pachataca punchayachirca.
Chaita ricushpami cai pachaca, manllashpa chujchurca.
5Urcucunapash, virashnami Mandaj Diospaj ñaupajpica yacuyarca.
Tucui cai pachata mandajuj Jatun Diospaj ñaupajpimi, chashna tucurca.
6Pai alitalla ruraj cajtaca, jahua pachami villajurca.
Paipaj, ushaitaca tucui gentecunami ricunajurca.
7Llajllashpa rurashca, imamambash rijchaj dioscunapajta rurajcunaca pingai tucuichiyari.
Chai rurashcalla dioscunahuan cushijuj gentecunapash, pingai tucuichiyari.
Rurashcalla dioscunapash, Paipaj ñaupajpi cungurichiyari.
8Sion pueblopi causajcunaca, chaita uyashpami cushijurca.
Mandaj Dioslla,
Judá llactapi causajcunapash,
Can alitalla ruraj cajpimi ninanda cushijunajurca.
9Mandaj Diosmi, tucui cai pachapica, tucuita yali mandaj capangui.
Tucui dioscunata yali, ninanda jatunyachi tucushcami capangui.
10Mandaj Diosta juyajcunaca, ima na alitapash na ruranachu canguichi.
Paimi, Paipajlla causajcunataca ricujun.
Diosta na manllajcunapaj maquimandapashmi cacharichijun.
11Alitalla rurajcunataca, Diosmi punchayachijun.
Shungupi alitalla yarijcunapajca, cushijuimi tiyanga.
12Alitalla rurajcunaca, Mandaj Dioshuan cushijuichiyari.
Paitaca, jucha illaj cashcamandami alicachina canguichi.
Who We AreWhat We EelieveWhat We Do
2025 by iamachristian.org,Inc All rights reserved.
