1Israel gentecunalla, cangunata Mandaj Diospajman tigrarinami canguichi.
Canguna juchata rurashcamandami llaquichi tucurcanguichi.
2Mandaj Diospajman tigrashpaca, cashna nishpami mañana canguichi:
“Na cazushpa, ñucanchi juchata rurashcataca, quishpichishpa chasquihuailla.
Can chasquijpica, ofrendatapash cupashunmi.
Ñucanchi shimihuambash jatunyachipashunmi.
3Asiria llacta runacuna, yanapashpa quishpichinatapash na shuyashunllu.
Paicunapaj caballocunapipash, cutinga na tiyarishunllu.
Ñucanchillata rurashca dioscunataca na: ‘Caimi ñucanchi dios’ nishunllu.
Taita mama illaj huahuatapash, canllami llaquingui” nishpami mañana canguichi.
4Taita Diosca: “Ñucallatami, paicuna na cazushpa juchata rurashcataca quishpichisha.
Paicunataca ninandami juyasha.
Cutinga na paicunataca fiñashpa llaquichishachu.
5Ñucami, Israelcunapaca, jamzi paramu tamiashna casha.
Paicunaca, lirio sisacunashnami canga.
Líbano shuti urcupi, cedro quirucunashnami canga.
6Paicunaca, jatun yurapi malquicuna viñashcashnami canga.
Olivo yurashna, juyaillagumi canga.
Líbano shuti urcu cedro quirucunashnami, mishquilla ashnajunga.
7Paicuna tigramushpaca, yuracuna shayanajuj ucupimi llandunga.
Chaipica, trigo viñajujshna, uvacuna sisajujshnami canga.
Líbano urcumanda vinoshnami, mishquilla ashnajunga.
8Shinamandami Efraín ayllucunaca:
‘Rurashcalla dioscunaca, ¿imapata ali canga’ ninajunga.
Ñucami, canguna mañashcataca uyashpa, punllandi ricuriajusha.
Paicunapaca, shuj jatun fangacunalla junda quirushnami casha.
Ñucami, paicunamanga imapash alicunata cusha” nircami.
9Cai villashcacunata yachangapaca,
¿caipi ima nijujtaca pita yachai ushanguichiyari?
Caicunata yachai ushangapaca,
¿pita alipacha yachajushca tiyanguichiyari?
Mandaj Diosca napacha llullashpami, aliguta yachachishpa pushajun.
Pai yachachishcata cazushpaca, tucuitami alitalla rurashpa causanajunga.
Ashtahuangarin na cazujcunaca, chaipillata urmashpami llaquita apanajunga.
Who We AreWhat We EelieveWhat We Do
2025 by iamachristian.org,Inc All rights reserved.
