OSEAS 7 - Quichua Imbabura 2016

Israelcuna, Diosta na cazushpa na alita rurashcamanda

1Israel gentecunata Ñuca alichijujpica,

Efraín ayllupipash, Samaria pueblopi causajcunapash juchacunata rurashcami ricurirca.

Paicunaca, umachishpa, huasiman yaicushpa shuhuashpa,

ñanda yalijcunata macashpa quichushpami na alicunata ruranajurca.

2Chashna na alicunata rurashcataca, Ñucaca alimi yachani.

Shina cajpipash, paicunaca napacha llaquirishpami causanajun.

Paicuna na alita rurashcacunaca, Ñuca ñaupajpimi tiyanajun.

3Paicunaca, llullashpa, na alita rurashpami,

jatun mandajtapash, cati mandajcunatapash cushichinajun.

4Paicunaca, cazarashca jahua shujcunahuanmi causanajun.

Paicunaca, tandata rurangapa hornota japichishcashnami.

Jacuta chapushca jipa, masa punguingacaman horno ama chiriyachun rupachishcashnami.

5Ñucanchi jatun mandajpaj punllapica,

cati mandajcunaca, vinohuanmi machanajurca.

Chashna, na cazuj gentecunahuanmi mandajca tandanajurca.

6Paicunaca, hornota rupachij runa,

tucui tuta yamdata rupachishpa pacarijshnami carca.

Chashna rurajpica, hornoca alipacha rupayashcami cayandipaca pacarin.

Chashnallatami paicunaca, llaquichinalla yariyaj pacarinajun.

7Tucui paicunaca, rupajuj hornoshna cashpami,

paicunapaj juezcunataca huañuchinajun.

Jatun mandajcunatapashmi, huañuchinajun.

Paipurapica Ñucata mañajca maijanllapash na tiyanllu.

8Efraín aylluca, Ñucata na cazuj shuj llacta gentecunahuanmi chapurishca.

Efraín aylluca, ashatalla cusashca tandashnami tucushca.

9Paicuna ima charishcatapash, shuj llactamanda runacuna apashpa tucuchinajundaca na yachashpami causanajurca.

Paicunaca, ushai illaj tucushcatapash na yachashpami causanajun.

10Shina cashpapash Israelcunaca,

paicunata Mandaj Taita Diospajman tigraringapaca napacha munarcachu.

Paicunaca ninanda jariyashpami, Taita Diostaca napacha yarinajurca.

11Efraín aylluca, imatapash na yachaj, yuyai illaj palomashnami carca.

Paicunaca, Egipto llactapi causajcunata,

Asiria llactapi causajcunatarami yanapahuai nishpa rinajurca.

12Ashtahuangarin, chashna nishpa rinajujpica,

Ñuca linllita shitashpami, jahuata rij alasyu animalcunatashna japishpa,

Ñuca nishcata pactachishpa ninanda llaquichisha.

13Ñucata saquishcamandaca, ¡aij paicunaca imachari tucunga!

Ñucata fiñashpa na cazushcamandami, paicunaca tucuchi tucunga.

Ñucami, paicunataca quishpichircani, ashtahuangarin paicunaca,

Ñucata fiñashpami llullashpalla villanajurca.

14Chugrishca nanaihuan sirinajushpa caparinajushpapash, na tucui shungu mañanajurcachu.

Trigota, llullu vinota charingapa munashpallami, chashna mañanajurca.

Shina cashpapash paicunaca, Ñucata na cazushpa fiñachishpallami causanajurca.

15Paicunataca ali causanata yachachishpa, shinllichishpa pushajujpipash,

na alitalla rurashpami, Ñucataca fiñachinajurca.

16Paicunaca, jahua pachapi causajuj Ñucataca na catinajunllu.

Paicunaca imata rurashpapash llaquipillami urmanajun.

Mandajcunapash, ninanda jariyashcamandami, espadahuan huañuchi tucunajurca.

Chashna na alicuna cajpimi, Egipto llacta runacunaca asishpa ricunajunga.