ISAÍAS 41 - Quichua Imbabura 2016

Israelcunataca, Taita Diosmi ricuriajun

1“Mama cucha manñacunapi causajcuna, uyahuaichi.

Tucui gentecuna shinlli tucushpa, Ñucapajman shamuichi.

Shamuichi, Ñucahuan parlangapa.

2¿Pita, llaquichij runataca, indi llujshimujmanda pushamurca?

¿Pita paitaca, tucuicuna llaquichishpa mandachun cayarca?

Llactacunatapash, ¿pita paipaj maquipi churarca?

Jatun mandajcunata mandachumbash, ¿pita churarca?

Espadahuanga ñutu alpatashna rurachun,

arcohuanga, chaquishca fangacunatashna, caita chaita fitichunga, ¿pita churarca?

3Pai maita rijushpapash,

catiriyashpa llaquichijuchunga ¿pita ushaita curca?

4¿Pita chashnapacha cachunga saquishcanga?

Callarimanda, cai pacha imashnalla canataca, ¿pita churashcanga?

Mandaj Dios Ñucami, callarimandapacha ricujuni.

Causaita causaicaman ima tucunatapash, Ñucallatami yachani” ninmi.

5Mama cucha manñacunapi causajcunaca, chaicunata ricushpami manllarinajurca.

Cai pachapi causajcunaca, tucuillami ninanda manllarishpa, tandanajushpa shamunajurca.

6Tucuicunami, paicunapaj quimiriajpi causajcunatapash, ayllucunatapash “shinlli tucuichi” nishpa yanapanajurca.

7Caspita llagllashpa imatalla ruraj runaca,

culquita imamambash tigrachij runamanmi ali yuyaita cujurca.

Tacashpa, imatapash llambullata ruraj runaca,

yunque jahuapi jirrucunata tacaj runatami:

“Cai jirruca, alimi llujshishca” nishpa cushichijurca.

Chai jipaca ama cuyurichunmi, alipacha tacashpa shayachijurca.

8“Israelcunalla, cangunaca Ñucapajta rurajcunami canguichi.

Jacobpaj miraicuna, cangunaca, Ñuca agllashpa juyashca Abrahambaj miraicunami canguichi.

9Ñucami, cangunataca tucui cai pachamanda pushamurcani.

Caru llactacunamanda cayashpami: ‘Ñucapajtalla rurajcunamari canguichi’ nircani.

Cangunata agllashpaca, napacha jichushpa saquircanichu.

10Na manllanachu canguichi, Ñucami cangunahuan cani.

Na shaijunachu canguichi, Ñucami cangunaman ushaita caraj Taita Dios cani.

Ñuca ninan ushaihuanmi, cangunapaj tucui causaipi charisha.

11Cangunata tucui fiñajcunami, pingai tucushpa, imatapash na rurai ushanajunga.

Cangunata fiñashpa rimajcunaca tucuillami tucuringa.

12Cangunata fiñashpa rimarijcuna, maipi mascajpipash illangami.

Cangunahuan macanajujcunaca, ima punllapash na tiyashcashnami tucunga.

13Ashtahuangarin cangunata Mandaj Dios Ñucami, cangunapaj maquimanda aisashpa pushasha.

Ñucami cangunataca: ‘Na manllanachu canguichi, Ñucami yanapasha’ nijuni.

14Israelcunata Quishpichij, Jucha illaj Mandaj Diosmi, caitapash nijuni:

‘Jacobpaj mirai Israelcuna, cangunaca jurushnalla cashpapash, huaquinlla cashpapash, na manllanachu canguichi.

Ñucami, cangunata yanapaj Dios cani.

15Cangunataca trillana mushuj jirrutashnami churarcani.

Quiru junda jirrutashnami churarcani.

Urcucunashna, lomacunashna cajpipash, cangunami jupata trillanshna ñutunguichi.

16Canguna, paicunata huairachijpica, huairami apanga.

Paicunataca, shinlli huaira shamushpami, caita chaita apanga.

Ashtahuangarin cangunaca, Mandaj Dioshuanmi cushijuna canguichi.

Israelcunapaj jucha illaj Dioshuanmi, cushijuna canguichi.

17Huajchacunaca, yacuta mascanajushpapash, na tarinllu.

Shinamandami, paicunapaj jallupash chaquishca.

Paicuna mañanajushcataca, Mandaj Dios Ñucami uyasha.

Israelcunapaj Taita Dios Ñucaca, paicunataca napacha jichushpa saquishachu.

18Urcucunamandami, huaicu yacucuna llujchijunga.

Pugru pambacunapimi, pugyucunata churasha.

Jichushca pambacunapimi, yacu cuchacunata rurasha.

Chaquishca pambacunapipash, yacucunami llujshijunga.

19Jichushca pambacunapica, cedro, acacia, arrayán, olivo quirucunatami viñachisha.

Shitashca pambacunapica, ciprés, pino, boje quirucunatami, tandachishpa viñachisha.

20Chaicunataca, Israelcunapaj jucha illaj Mandaj Diosmi chashna rurasha.

Tucuicuna ali ricushpa, yachachunmi chashna rurasha ninimi’ ninmi” nijurcami.

Mandaj Diosca, rurashcalla dioscunatami rimashca

21Jacobpaj miraicunata Jatun Mandaj Diosca, cashnami nin:

“Rurashcalla dioscunata catijcunaca, imatallapash rurashpami ricuchina canguichi.

22Jipa punlla ima tucunatapash villaichiyari.

Yalishca huatacunapi, callarimandapacha ima tucushcatapash villaichiyari.

Chashna villajpica, tucuicuna cangunataca catingallami.

Yalishca punllacunapi ima tucunatapash, jipa punllacunapi ima tucunatapash villaichiyari.

23Rurashcalla dioscuna, ushaita charijta yachangapaca,

jipa punllacuna ima tucunatapash villaichiyari.

Na cashpaca, tucuicuna manllarishpa parlanajuchun,

ima alitapash, ima na alitapash ruraichiyari.

24Cangunaca, yangallatamari canguichi.

Canguna maipi imata rurashcapash, na ricurinllu.

Cangunata catijcunataca millanayachinimi.

25Janaj llactamandami, shuj runata pushamugrini.

Indi llujshimuj llactamanda shamushpami, Ñuca shutipi mañanga.

Paica mandajcunataca, sarushpami tucuchinga.

Mangata ruraj runa turuta sarujshnami tucuchinga.

26Chaita ñucanchi yachachunga, ¿pita pundallata villashcanga?

Na cashpaca, ¿Nara imapash tucujpillata, ñachu villashca carca?

Villashca cajpica: ‘Chai villashcacunaca ña pactashcami’ ninmanmi.

Pipash chaitaca na villashcachu.

Pipash chaitaca na yachachishcachu.

Canguna villashcataca pipash na uyashcachu.

27Ñucami, Sion pueblopi causajcunamanga pundallata caicunataca yachachircani.

Ñucallatami, cai Jerusalenbi causajcunaman cushijunata villachun, shuj villaj runata cachamusha.

28Ñuca ricujpica, shuj dioscunaca na ricurircachu.

Ñuca tapujpica, chaipica ima yuyaita cungapaca, shujllapash na tiyarcachu.

Paicunata tapujpica, shuj shimitallapash na tigrachinajurcachu.

29Tucui paicunaca yangallatami.

Paicuna maipi imata rurashcapash, napacha ricurinllu.

Imatapash yacuyachishpa rurashca dioscunaca, huairashna yangacunami.