1 CORINTIOS 6 - Quichua Imbabura 2016

Ima llaqui tiyajpipash, na crijcunamanga na villagrinachu canguichi

1Cangunapurapi fiñanajui tiyajpica, Diospajlla causajcunami ricushpa alichina canguichi. Shina cashpaca ¿imashpata, Diosta na cazujcunapaj ñaupajmanra ringuichi?

2Cai pachapi causajcuna, imatalla rurashcata, Diospajlla causajcuna juez tucushpa ricuchina cashcataca ¿nachu yachanguichi? Cai pachapi causajcunata canguna juez tucushpa ricuchina cashpaca, ¿imashpata na ashalla fiñanajushcata alichitaca ushanguichi?

3Angelcuna imata rurashcatapash, ñucanchi juez tucushpa ricuchina cashcataca, ¿nachu yachanguichi? Shina cashpaca, cai causaipi ima fiñanajui tiyajtaca, ¿imashpata na alichi ushana canchi?

4Cai causaipi fiñanajuicuna tiyajpica, ¿imashpata na crijcunapaj ñaupajmanra rishpa “alichipai” ninajunguichi?

5Canguna pingai tucuchunmi cashna nini: Crijcunapura fiñanajushcata alichingapaca, ¿nachu cangunapurapillata ali yachajushcacuna shujllapash tiyanguichi?

6Ashtahuangarin, crijcunapura fiñanajushpaca ¿imashpata na crijcunapajmanra rinajunguichi?

7Cangunapurallata fiñanajushpaca, na alitapachami ruranajunguichi. Chaipaj randica, ¿imashpata na llaquita apanguichilla? Shinallata, umachishpa quichushpa apajpipash, ¿imashpata na saquinguichilla?

8Ashtahuangarin cangunaca, crijpurallata llaquichirishpa, umachishpa shuhuarishpami puringuichi.

9Na alitalla rurashpa causajcunaca, Taita Dios mandajuj llactapi, imatapash na japigrinataca ¿nachu yachanguichi? Na pandanachu canguichi. Huainayajcuna, rurashcalla dioscunata mañajcuna, cazarashca jahua shujhuan causajcuna, huarmicunashna causaj runacuna, jaripurallata huarmihuajshna puñujcuna,

10shuhuacuna, charishpapash ashtahuan charijyangapa munajcuna, machajcuna, “ima llaquipash japishpami ali canman” nijcuna, ñavi ñavi shuhuajcunapash, Taita Dios mandajuj llactapica napacha imatapash japigringachu.

11Cangunapash huaquingunaca chashnallatami causarcanguichi. Ashtahuangarin, Apunchi Jesuspaj shutipi, ñucanchi Taita Diospaj Espiritumandapashmi, ña mapa illaj tucushcacuna canguichi. Shinallata, Diospajlla causanajushpami, alitalla rurashcacunashna chasqui tucushcacuna canguichi.

Taita Diosta alicachinami canguichi

12Tucui imatapash rurai usharingallami, ashtahuangarin na tucuilla ñucapaca alichu. Tucui imatapash rurai usharingallami, ashtahuangarin chaicunara ñucata mandashpa charichunga napacha saquishachu.

13Micunaca vijsapami, vijsaca micunapajmi. Ashtahuangarin Taita Diosca, ishcanditami tucuchinga. Shina cajpipash ñucanchi cuerpotaca, huainayachunga na rurashcachu. Ashtahuangarin, Apunchi Jesuspajlla causachunmi rurashca. Apunchi Jesusmi, ñucanchi cuerpotapash mandajun.

14Apunchi Jesusta causachij Taita Diosllatami, ñucanchitapash paipaj ushaihuan causachinga.

15Cangunapaj cuerpopash Cristopajlla cajtaca, ¿nachu yachanguichi? ¿Cristopaj cuerpo cashca jahuachu, culquimanda huainayaj huarmihuan shujlla tucuna cani? Napacha chashnachu.

16Maijan cashpapash, culquimanda huainayaj huarmihuan huainayashpaca, chai huarmihuan shujlla cuerpo tucujtaca ¿nachu yachanguichi? Quilcashcapica: “Ishcandimi, shujlla aicha tucunga” nijunmi.

17Ashtahuangarin, Apunchi Jesushuan shujlla tucushpaca, Paihuanmi espiritupica shujlla tucun.

18Huainayashpa causanamandaca anchurinami canguichi. Maijan cashpapash ima shuj juchata rurajpica, paipaj cuerpopica na tacarinllu. Ashtahuangarin, huainayashpa juchata rurashpaca, paipaj cuerpopimi llaquita apanga.

19Cangunapaj cuerpoca, Jucha illaj Espíritu causajuj huasi cajtaca, ¿nachu yachanguichi? Taita Dios carajpimi chai Espirituca, cangunapaj shungupi causajun. Shinamandami, na cangunapajllata causanajunguichi.

20Cangunaca, culquita cushpa randishcami canguichi. Shina cajpimi cangunapaj cuerpohuan, espirituhuambash, Taita Diosta alicachina canguichi. Cuerpopash, (espiritupash, Taita Diospajmi).