LEVÍTICO 21 - Quichua Imbabura 2016

Sacerdotecuna, Diospajlla causanamanda

1Mandaj Diosca, Moisestaca cashnami nirca:

“Aaronbaj churicunaman cashna nishpa villai: ‘Cangunapaj llactapi maijambash huañujpi, chaipi tacarishpaca na mapayanachu canguichi.

2Ashtahuangarin, paipaj mama, paipaj taita, paipaj churi, paipaj huauqui huañujpica, paipaj ayllupacha cashcamandami tacarinalla canga.

3Shinallata, jarihuan nara ima tucushca, nara cazarashca, huasipi causaj pani huañujpica, tacarinallami canga.

4Chai huañushca pani cazarashca cajpica, chai llactapi causajuj maijan runa mapayashcashnaca, na mapayanachu canga.

5Sacerdotecunaca, chaupi umapi ajchatapash na muyundita rutuchinachu canguichi, barbas pundatapash na rutushpa huaglichinachu canguichi. Paipaj aichapipash, na aspishpa chugririnachu canguichi.

6Sacerdotecunaca, Taita Diospajlla shicanyachishca cashpami, Taita Diospaj shutitapash, na yangapi churanga. Shinallata, Mandaj Diosman ofrendata rupachishpa, Taita Diosman carashca tandata cushpami paicunaca, Diospajlla shicanyachishca causanajunga.

7Culquimandalla huainayaj, na alicachishca huarmihuambash, cusa jichushca huarmihuambash na cazarangachu. Sacerdotecunaca, Taita Diospajlla shicanyachishcacuna cashpami, na chashna ruranajunga.

8Sacerdotecunataca, Taita Diosman carashca tandata Diosman cunajun cashcamandami, Diospajlla cachun shicanyachina canga. Mandaj Dios Ñucami, sacerdotecunataca jucha illaj cachun agllarcani.

9Sacerdotepaj ushi huainayashpa causai callarishpaca, paipaj taitatami yangapi churan. Chaimandami, chai ushica rupachi tucunga.

10Sacerdotepuramanda, paipaj umapi aceiteta talishpa javishca mandaj sacerdote tucushpaca, Diospajlla shicanyachishca churajunatami churajunga. Shina cashpaca, paipaj umapi churajushcatapash na llujchingachu, pai churajushcacunatapash na liquingachu.

11Shinallata, huañushca sirijuj ucumambash na yaicungachu. Paipaj taitapacha, mamapacha huañujpipash na mapayangachu.

12Diospajlla huasimandapash na llujshingachu. Paipaj, Taita Diospaj huasitapash na yangapi churangachu. Paitaca, Taita Diospajlla causachunmi, aceiteta talishpa javishpa, Diospajlla cachun shicanyachishca. Ñucami, Mandaj Dios cani.

13Paica, jarihuan nara tacarishca cuitsagutami, paipaj huarmi cachun japinga.

14Paica, sapalla huarmitapash, na alicachishca huarmitapash, cusa jichushca huarmitapash, culquimanda huainayaj huarmitapash napacha cazarangachu. Ashtahuangarin, paipaj llactamandallata, jarihuan nara tacarishca cuitsagutami, paipaj huarmi cachun japinga.

15Paipaj miraicuna, Israelpurapi ama na alicachi tucushca cachunmi, chaitaca na rurana canga. Mandaj Dios Ñucami, jucha illaj causachun shicanyachij Dios cani’ nishpa villai” nijurcami.

16Mandaj Diosca, Moisestaca cashnami nijurca:

17“Aaronmanga cashna nishpa villangui: ‘Cambaj miraicunamanda maijan cashpapash, aichapi na ali cashpaca, Taita Diosman tandata cungapaca na chayai ushangachu.

18Imapash na ali cashpaca, maijan runapash, Diospaj ñaupajmanga na quimiri ushangachu. Ñausa cashpa, janga cashpa, paipaj cuerpomanda imatapash fiti tucushca cashpa, imapash huagli viñashca cashpapash na quimiri ushangachu.

19Shinallata, chaqui faqui cashpa, maqui faqui cashpapash na quimiri ushangachu.

20Na cashpaca, cunga tullu llujshishca cashpa, uchilla runa cashpa, ñavipi yuraj tiyarishca cashpa, carachalla cashpa, chupushca cashpa, lulun illaj runa cashpapash, na quimirita ushangachu.

21Sacerdote Aaronbaj miraicunamandaca, maijan cashpapash imapipash huagli cashpaca, Mandaj Diosman carashcata rupachishpa cungapa quimiritaca, na ushangachu. Paipi, huagli tiyashcamandami na quimiri ushanga. Taita Diosman carashca tandata cungapapash, na quimiri ushangachu.

22Shina cashpapash, Taita Diospajlla shicanyachishpa, paiman rupachishpa carashcacunataca micui ushangallami.

23Ashtahuangarin, paipi huagli tiyashcamandami, fachahuan quilpashca huashamambash, altarmambash na quimiri ushanga. Ñucapajlla huasita ama yangapi churangapami, na quimiri ushanga. Mandaj Dios Ñucami, jucha illaj causachun agllarcani’ nishpa villai” nijurcami.

24Chaipimi Moisesca, Aaronmambash, paipaj churicunamambash, tucui Israelcunamambash villajurca.