EFESIOS 6 - Quichua Imbabura 2016

1Huahuacuna, cangunapaj taitata, mamataca, Apunchi Jesusta cazunshnami cazuna canguichi. Caitaca, pactachinapacha cajpimi chashna rurana canguichi.

2Cambaj taitata, mamata alicachishpa cazujpimi, “carashapachami” nishpa punda mandashcapica tiyajun.

3“Tucuipi ali causashpa, cai pachapipash unaicaman causangapami chashna cazuna cangui” nijunmi.

4Taitacuna, cangunapaj huahuacunataca na yangamanda fiñachinachu canguichi. Ashtahuangarin, shinlli tacurishpa, aliguta yarichishpami, Apunchi Jesús munashcashna viñachina canguichi.

5Gañangunapash, cai pachapi cangunapaj mandajcunataca, Cristota cazunshnami, manllaihuan, na jariyashpa, ali shunguhuan cazuna canguichi.

6Gentecuna alicachinajuchun yashpalla rurajcunashnaca na canachu canguichi. Paicunaca, ricunajujpillami alita ruranajun. Ashtahuangarin, Cristopajta rurajcunashnami, Taita Diospaj munaita, tucui shunguhuan, imatapash rurana canguichi.

7Gentecunaman rurajshnaca, na ruranachu canguichi. Ashtahuangarin, Apunchi Jesusman rurajshnami, tucui shunguhuan, tucui munaihuan pactachina canguichi.

8Ima alita rurashca cashpapash, gañan cashpa, na gañan cashpapash, Apunchi Jesús carasha nijushcata tucuicuna japigrinataca yachanguichimi.

9Mandajcunapash, cangunapaj gañangunataca, imahuambash na manllachishpami aliguta charina canguichi. Cangunatapash, paicunatapash, Mandaj Diosca, jahua pachapi tiyajujta yachashpami chashna ali cana canguichi. Diosca, na ñavita ricushpalla chasquijunllu.

Taita Diosmi, macanajuna ushaita caramujun

10Ñuca juyashca crijcuna, Apunchi Jesushuan, Paipaj ninan ushaihuanmi shinlli tucuna canguichi.

11Diablo umachishpa urmachingapa munajpi, shinlli shayaringapa macanajuchun, Taita Dios cushca tucui churajunatami churajuna canguichi.

12Ñucanchi macanajuica, yahuarta, aichata charij runacunahuanga na canllu. Ashtahuangarin, mandaj ayacunahuan, ushaita charij ayacunahuanmi macanajunchi. Cai pachapi yana tutapishna causajcunata mandaj ayacunahuan, jahua huairapi mandaj, na alita rurachij ayacunahuanmi macanajunchi.

13Shinamandami, na ali punllacuna chayamujpi, shinlli shayaringapaca, macanajungapa Taita Dios cushca tucui churajunata japina canguichi. Shinami, tucuita mishashpa shinllipacha shayari ushanguichi.

14Na llullashpa villajuj Shimihuanga, cinturasta alipacha chumbilishcashnami shayarina canguichi. Alitalla ruranahuanga, jirru churajunata pechopi churajushcashnami shayarina canguichi.

15Ali causaita caraj, quishpirinamanda villaj shimita villangapaca, chaquipi ali churajushcashnami alichirishcalla shuyana canguichi.

16Tucuimanda yalica, alipacha crinatami escudotashna japina canguichi. Chaihuanmi, flecha pundapi ninata japichishpa diablo shitamujujtaca, jarcashpa huañuchi ushanguichi.

17Canguna quishpirishcataca, umapi churajuna cascotashnami churajuna canguichi. Diospaj Shimitaca, Diospaj Espíritu caramushca espada cajpimi, chaitaca japinapacha canguichi.

18Diospaj Espíritu mañana yuyaita cujpimi, na samashpa ninandapacha mañariana canguichi. Cungaitapash na cungashpami, Diospajlla causajcunamandapash, tucuicunamanda, ninandapacha mañariana canguichi.

19Ñucapash, Dios yarichijpi villajuchunmi mañana capanguichi. Shina yarichijpimi, quishpirinamanda villana, pacalla tiyajushcataca, na manllashpa villajusha.

20Chaita villachun cachamushca cashpami, cadenacunahuan huatai tucushca tiyajuni. Ñucaman mingashcataca, ama manllashpa villajungapami, Diosta mañapanguichi nijuni.

“Aliguta causapanguichi” nishpami tucuchishca

21Caipi imata ñuca rurashpa causajtapash, ñuca juyashca Tíquico shuti huauquimi cangunaman aliguta villanga. Paimi, Apunchi Jesuspajtaca aligutapacha rurashpa tucuita pactachijun.

22Paitaca, ñucanchi imashna tiyanajundapash villashpa, cangunapaj shunguta cushichijuchunmi cachamuni.

23Cushijushpa causanata, juyarishpa causanata, alipacha crishpa catinata, Taita Diospash, Apunchi Jesucristopash, tucui crijcunaman carachunmi munani.

24Diospaj ninan juyaica, ñucanchi Apunchi Jesucristota juyashpa causajcunahuan cachunmi munani. Paicunaca, juyaita na saquishpa catichunmi munani. Chashna cachun.