APOCALIPSIS 12 - Quichua Imbabura 2016

Huarmimandapash, dragonmandapash

1Chai jipallami jahua pachapica, shuj ninan manllarina ricurirca: Indita churajushca huarmimi, lunata sarushpa shayajurca. Umapipash, chunga ishcai luzerocunahuan coronata churajushcami carca.

2Chai huarmica, vijsayu cashpa, unguna pactajpi, ña ungugrijushpami, nanaihuan ninanda caparijurca.

3Shinallata, cutinmi jahua pachapica, shuj ninan manllarina ricurirca: Canchis umata charij, chunga cachuta charij, yana puca jatun dragón animaltami ricurcani. Chai canchis umacunapica, coronacunata churajushcami carca.

4Paipaj chupahuan aisashpami, quimsata chaupishpa churashca, chai quimsamanda shuj chaupi luzerocunataca, jahua pachamanda cai pachaman urmachirca. Chai dragonga, huahua huacharijhuan micungapami, ungunalla huarmipaj ñaupajpi shayajurca.

5Chai huarmica, jari huahuatami ungurca. Chai huahuami, cai pachapi tucui causajcunataca, jirru varahuan mandajunga. Chai huahuataca, mandangapa tiyarinapi tiyajuj Taita Diospajmanmi aparca.

6Chai huarmica, Taita Dios alichishca charijuj jichushca pambapi pacajungapami calparca. Chaipimi, shuj huaranga ishcai patsaj sucta chunga punllacaman micunata carana carca.

7Chai jipallami, jahua pachapica jatun macanajui tiyarca. Miguel shuti angelca, paipaj angelcunandimi, dragonhuan macanajurca. Shinallatami dragonbash, paipaj angelcunandi macanajurca.

8Shina cashpapash, chai dragonga na mishai usharcachu. Jahua pachapipash, paicunapaj causanaca illarcami.

9Chai dragonga, jahua pachamandami shitai tucurca. Paica, diablo shutipash, Satanás shutipash, pundamandapacha causajuj culebrami. Paillatami, tucui cai pachapi causajcunata umachishpa causajun. Paica, paipaj angelcunandimi alpaman shitai tucurca.

10Chai jipami, cashna nishpa jahua pachapi ninanda caparinajujta uyarcani:

“Cunanmari, quishpichina punllapash,

Taita Dios ninan ushaihuan mandanapash,

Paipaj Churi Jesucristo mandanapash, ñucanchipajman chayamushca.

Ñucanchi Taita Diospaj ñaupajpi, tutapash, punllapash,

ñucanchi huauquicunata juchachishpa causajujtaca, ñami shitamushca.

11Chai huauquicunaca, Llamagupaj yahuarmandapash,

Diospaj Shimita villashcamandapashmi, diablotaca mishashca.

Paicunaca, huañuchi tucuna cashpapash, na manllashpami causanajurca.

12Chaimandami, jahua pachapash, chaipi causajcunapash,

ninanda cushijuna canguichi.

Alpapi causajcunapash, mama cuchapi causajcunapash,

¡aij imachari tucunguichi!

Diabloca, punllacuna tucurijunda yachashpami,

ninanda fiñarishpa cangunapajman urai shamurca” ninajujtami uyarcani.

13Chai dragonga, alpaman ña shitai tucushca cashpami, jari huahuata ungushca huarmitaca, huañuchingapa catiriyajurca.

14Shina catiriyajujpimi, jatun angapaj ishcai alasta chai huarmiman curca. Chai alascunata cujpimi, chai culebrapaj ñaupajmandaca, pai causachun ricuchishca jichushca pambaman pacajushpa rirca. Chai pambapimi, quimsa huata chaupicaman, micunata Dios carajpi causajurca.

15Chai culebrami, paipaj shimimandaca, chai huarmita catishpa llaquichijuchun, jatun larca yacutashna shitajurca.

16Ashtahuangarin, chai dragonbaj shimimanda shitashca yacutaca, alpa pascarishpami langarca. Shina langashpami, chai huarmitaca quishpichirca.

17Chaimandami dragonga, chai huarmitaca ninanda fiñashpa, chai huarmipaj miraicunahuan macanajungapa rirca. Paicunaca, Taita Dios mandashca shimicunata cazushpa causajcuna, shinallata, Jesucristo villashcatapash, aliguta pactachijcunami carca.