EZEQUIEL 5 - Quichua Imbabura 2016

1“Huañuna aichayuj runa, filo cuchillota japishpa, cambaj barbastapash, ajchatapash tucuilla cuchuringui. Chai jipaca, shuj balanzapi pezashpa, ajchataca quimsapi chaupingui.

2Macanajuna punllacuna ña pactajpica, quimsapi chaupishca ajchataca, pueblo chaupiman apashpa rupachingui. Shujpaj cati chaupishca ajchataca, pueblo muyundipi espadahuan fitingui. Ishcaipaj cati chaupishca ajchataca, chafsishpa huairapi cachangui. Ñucami paicunataca espadahuan, catishpa risha.

3Chai ajchamanda ashata japishpa, cambaj churajuna pundapi huatangui.

4Shinallata asha ajchataca ninapi rupachingui. Chai nina japirishpami, Israelcunataca tucuilla rupachinga” nircami.

5Mandaj Diosca, cashnatapashmi nirca: “Ñucami Jerusalenbi causajcunataca, cai llactapi tiyan pueblocunapaj chaupipi causachun churarcani.

6Ashtahuangarin paicunaca, Ñuca mandashcacunata, Ñuca yachachishcacunataca napacha cazushpami causarca. Chashna cashpami, cai llactapi, chai pueblocunapi causajcunataca yali na alita ruranajurca” nircami.

7Chaimandami Mandaj Diosca, cashna nirca: “Cangunapaj muyundi llactacunapi causajcunatapash yali na alita rurashpami, ñuca mandashcacunataca na cazurcanguichi. Ñuca mandashca shimicunataca, napacha pactachingapa munashpami causarcanguichi. Cangunapaj muyundi llactacunapi causajcuna mandashcatapash na cazushpami causarcanguichi” nircami.

8Chaimandami, Mandaj Dios Ñucaca, cashna nini: “Cangunahuanga ninanda fiñarishca cashpami, tucui llactacuna ricujta llaquichigrini.

9Napacha alicuna cashcamandami, ninandapacha llaquichisha. Chashna llaquicunataca cutinga, napacha cachamushachu.

10Chai llaquicunapimi, taitacunallata paicunapaj huahuacunata micunga. Shinallata, huahuacunami, paicunapaj taitacunata micunga. Chashna llaquichishpami, huaquin puchushcacunataca, huairapishna, caita chaita cachashpa tucuchisha.

11Mandaj Dios Ñucami, causaita causajuni. Canguna ninan na alicunata rurashpa, Ñuca huasita yangapi churashcamandami llaquichinapacha cani. Chashna cashcamandami cangunataca, napacha llaquishpa, juyasha.

12Cangunamanda, quimsapi shicanyachishca gentecunaca, millai ungüihuan, yarjaihuanmi huañunga. Shuj quimsapi shicanyachishca gentecunaca, macanajuipimi huañunga. Shuj quimsapi shicanyachishca gentecunaca, huairachijpishnami, caita chaita ringa. Paicunataca, Ñucallatami espadahuan llaquichisha.

13Chashna llaquichishpami, Ñuca ninanda fiñarishcataca yalichisha. Chashna rurashpa Ñuca fiñashcata yalichijpimi, Mandaj Dios Ñucapajlla cachun munashpa rimashcataca yachanga.

14Jerusalén pueblotaca, jichushca sirichunmi shitashpa saquisha. Cambaj muyundi llactacunapi causajcunapash, cai ñanda yalijcunapash na alicachishpa ricuchunmi shitashpa saquisha.

15Ñuca ninandapacha fiñarishpa, canda llaquichijujpica, cambaj muyundi llactacunapi causajcunami, na alicachishpa rimashpa, asishpa, manllarishpa ricunajunga. Caitaca Mandaj Dios Ñucami chashna nini.

16Paicunata llaquichishpa tucuchingapami, ninan yarjai punllacunata cachamusha. Ashtahuan llaquichina punllacunata cachamujpimi, micunapash illajpi huañushpa tucuringa.

17Ñucami yarjaihuambash, millai animalcunahuambash llaquichisha. Chaipimi, ninan yarjaipash, millai ungüipash, jatun macanajuipash chayamunga. Caitaca, Mandaj Dios Ñucallatami chashna nini” nihuarcami.