2 TIMOTEO 3 - Quichua Imbabura 2016

Tucurimui punllacunapica, ashtahuan na ali gentecunami tiyanga

1Caitapash yachanami cangui: Tucurimui punllacunapica, jatun manllanayai llaqui punllacunami chayamunga.

2Chai punllacunapica: Pailla ali cangapa munajcuna, charijyangapalla munajcuna, pitapash yalimi canchi nijcuna, jariyashpa jatun tucuncuna, Diostapash na ali shimicunata rimajcunami tiyanga. Taitata, mamatapash na cazujcuna, imamandapash na pashi nijcuna, Diostapash na manllajcunami tiyanga.

3Shinallata, pitapash na juyajcuna, manllanayaita fiñarijcuna, yangata juchachijcuna, ima munashcata rurajcuna, llaquitapash na llaquijcuna, ima alitapash na ricunayachijcunami tiyanga.

4Ari nishpalla umachijcuna, na ali yarishpata rimajcuna, imamandapash ninanda jariyajcuna, Taita Diostapash na juyashpa, yanga cushijushpa causanatalla juyajcunami tiyanga.

5Ñavi ricuipica, Diosta juyajshnallami ricuringa. Shina cashpapash,napacha Diosta cazushpami causanajunga. Chashnacunamandaca anchurinami cangui.

6Chashna gentecunami, huasicunaman yaicushpa, juchatalla rurashpa causanajuj na ali huarmicunata prezu japijshna charinajun. Chai huarmicunaca, na ali munaicunatalla rurangapami yariashpa causanajun.

7Chai huarmicunaca, yachajunajushpapash, na llullashpa villajuj Shimitaca napacha yuyaipi japi ushanllu.

8Janes shuti, Jambres shuti runacuna, Moisesta na cazushcashnami, na llullashpa villajuj shimitaca na cazunajun. Chashnacunaca, na alitalla yarij cashpami, critapash napacha ushanga.

9Ashtahuangarin paicunaca, na unaicaman pandachishpa causangachu. Paicuna juizu illajcuna cajtaca, tucuicunami yachanga. Chai ishcai runacunapash shinallatami tucushca.

10Ashtahuangarin canga, Diosmanda ñuca yachachijujtami catishcangui. Aliguta causanata, alita rurashpa pactachinata, crishpa causanata, imamandapash na fiñarishpa causanata, juyashpa causanata, na ñapash fiñarij canatami catijungui.

11Antioquía, Iconio, Listra shuti pueblocunapica, ñucata fiñashpa catiriyashpa llaquichijpimi, llaquicunata apajurcani. Chai tucui llaquicunamandaca, Apunchi Jesusmi cacharichihuarca.

12Cristo Jesusta crishpa, Paita yariashpa tucui causajcunaca, shinallatami catiriyashpa llaquichi tucunga.

13Ashtahuangarin, na alitalla rurashpa, shujcunata pandachijcunaca ashtahuan ashtahuanmi na aliman tigranga. Shujcunatapash pandachishpami, paicunallatapash pandarinajunga.

14Ashtahuangarin, can crishpa yachajushcataca catijunallami cangui. Canman maijan yachachishcatapash, ali yachashpami chashna catijunalla cangui.

15Dios quilcachishca jucha illaj Shimicunataca, huahuamandapachami yachajushcangui. Chai shimicunami candaca, Cristo Jesusta crishpa quishpirichun, alipacha yachajushca cachun yachachinga.

16Dios quilcachishca tucui Shimicunaca, Paillata yarichishpa quilcachishca cashpami, yachachingapa, shinllita rimashpa ali causaiman pushangapa, alita rurashpa causachun yachachingapa ali.

17Chashna yachajushpami, Taita Diospajta rurajcunaca, ima pandatapash na rurashpa, tucui imata Diospajta rurangapapash aligutapacha alichirishcalla canga.