EZEQUIEL 3 - Quichua Imbabura 2016

1Ñucataca cashnami nihuarca: “Huañuna aichayuj runa, ima tarishcata micunallami cangui. Cai pillushca caratapash micunallami cangui. Chai jipaca, Israelcunapajman rishpa villagrilla” nihuarcami.

2Shina nishca jipaca, ñuca shimita pascajpimi, chai pillushca carata micuchihuarca.

3Chai jipaca, cashnami nihuarca: “Huañuna aichayuj runa, cai pillushca carataca, cambaj vijsa pactajta micuilla” nijpimi micurcani. Chaita micujpica, balun mishquishnami carca.

4Chai jipaca, cashnami nihuarca: “Huañuna aichayuj runa, Israelcunapajman rishpa ñuca imatalla nishcata villagrilla.

5Candaca, na rigsishca rimaicunata rimaj gentecunapajmanga, na cachajunichu. Ashtahuangarin, Israel gentecunapajmanmi cachajuni.

6Can na yachai ushanalla, na rigsishca rimaicunata rimaj gentecunapajmanga, na cachajunichu. Paicunapajman cachajpica, paicunarapash uyanmanmi.

7Ashtahuangarin Israelcunaca, Ñucata na cazujcuna cashpami, can villashcataca napacha uyangapa munanga. Tucui Israelcunami, shinlli shungucuna cashpa, na uyangapa munan.

8Ñucami candaca paicunaman villachun ushaita cushpa cachajuni. Na manllashpa paicunahuan chimbapura rimachunmi chashna cachajuni.

9Cambaj yuyaitaca, shinlli diamante rumishna cachunmi rurani. Paicunaca na cazujcuna cajpipash, paicunapaj ñaupajpica na manllashpami villana cangui” nihuarcami.

10Cashnatapashmi nihuarca: “Huañuna aichayuj runa, Ñuca imatalla villashca shimicunataca, aliguta uyashpa cambaj shungupi chasquingui.

11Chai jipaca cambaj llactapura prezu tiyanajunpajman rishpa: ‘Mandaj Jatun Diosca, cashnami nin’ nishpa, uyachun na uyachumbash villangui” nihuarcami.

12Chai jipami, Diospaj Espirituca ñucaman ushaita cushpa shinllichihuarca. Shina cajpimi, ñuca huashamanga cashna nishpa ninanda caparij uyarirca: “Mandaj Dios, Paipaj ninan ushaihuan mandashpa tiyajuj pushtutaca, ninanda alicachishca cachun” nijujmi uyarirca.

13Shinallata causaita charijcunapash, paicunapaj alascunahuan huactarinajujtami uyarcani. Paicunapaj ñaupajpica, pirurucunapash shinllitapachami uyarijurca. Chaicunaca, alpa mamapash cuyunshnami chashna uyarijurca.

14Chai jipami, Diospaj Espirituca chaimanda llujchishpa pushahuarca. Chaimanda llujshishpaca, ninanda llaquirishpami huacai huacai rircani. Ashtahuangarin, Mandaj Diospaj ninan ushaimi ñucataca shinllichihuarca.

15Chai jipaca, Quebar shuti yacu manñapi tiyaj Tel-abib shuti pueblopi causanajuj prezucunapajmanmi chayarcani. Paicuna tiyarishca pushtupillata tiyarishpami, canchis punllacaman imatapash na nishpa, upalla tiyajurcani.

Israelcunata ricuriachun, Ezequielta churashcamanda(Ez. 33:1-9)

16Ña canchis punlla jipami Mandaj Diosca cai shimicunata, cashna nishpa villahuarca:

17“Huañuna aichayuj runa, candaca, Israelcunata ricuriachunmi churarcani. Ñuca rimashcataca aligutapacha uyashpa, paicuna ali tucuchun, ñucapaj randi shinllita rimangui.

18Ñucata na manllaj runataca: ‘Ñami huañugringui’ nishami. Shina cajpipash, chai na ali runa, ali tucuchun, can na shinllita rimajpi, pai juchata rurashcamanda huañujpica, candami llaquichisha.

19Ashtahuangarin, Ñucata na manllaj runa ali tucuchun shinllita can tacurishca jahua, na alita ruranata, na ali causaitapash na saquishpa, Ñucapajman na tigrarishpaca, paipaj juchamandami huañunga. Ashtahuangarin canga, ima llaquitapash na japinguichu.

20Shinallata alitalla ruraj runa, ali canata saquishpa na alita rurajpi, pandarishpa urmachun Ñuca saquijpica, paica huañungami. Shinallata, canga, paita na shinlli tacurijpi, paipaj juchamanda huañujpica, canmi llaquita apangui.

21Shina cashpapash, alitalla ruraj runa ama juchata rurachun, shinllita can tacurijpi, juchata ruranata saquishpaca, paica causangapachami. Ali tucuchun can shinllita tacurishcamandami paica causanga. Shina cajpimi cambash, ima llaquitapash na japingui” nihuarcami.

Profeta Ezequiel, upa tucushcamanda

22Chaipimi Mandaj Diospaj ninan ushai ñucapajman shamushpa, cashna nihuarca: “Jatarishpa pambaman llujshi, chaipimi canhuan parlasha” nihuarcami.

23Shina nijpimi ñucaca, jatarishpa pambaman llujshircani. Chaipimi, Mandaj Diosca, Quebar shuti yacu manñapi ricurishcashnallata, ninan ushaihuan ricurijpi cungurishpa, alpaman chayajta cumurijurcani.

24Chai jipami, Diospaj Espirituca ñucaman ushaita cushpa shinllichihuarca. Chaipica, cashnami nihuarca: “Cambaj huasi ucuman yaicushpa punguta vicharingui.

25Huañuna aichayuj runa, candaca cabiacunahuan huatajpimi, chaimandaca na llujshi ushangui.

26Cambaj jallutaca, shimi ucu jahuaman llutajpimi, canga na rimai ushangui. Paicunataca, na cazujcuna cajpipash jarcashpa rimaitaca na ushanguichu.

27Ashtahuangarin, Ñuca imatapash rimangapa munashpallami, can rimachunga cambaj shimita pascasha. Shina cajpimi canga, cashna ningui: Mandaj Jatun Diosca, cashnami nin: ‘Maijambash uyangapa munajcunaca uyachun. Na uyangapa munajcunaca, ama uyachun’ ninmi ningui. Paicunaca na cazuj gentecunami.